منهنه ربيان...



بالكويتي يسمونه منهنه وبالحساوي يسمونه مفلق والتسميه يت من سالفه تحميص الجريش ... اختلفت التسميات والطريقه وحده طبعا تقدرون تسوونه باي ادام تحبونه بس انا احبه اكثر بالربيان واحب ارش معاه حبه بركه بس خواتي ما يحبونها... وللتغير جربوه مع الفقع يصير واااو... يدتي تحط معاه حلبه بس انا ماحب ريحتها


طبعا اكتب هالوصفه وحدي داشه مود واسمع اغنيه عبدالله رويشد ( تذكرني )... لووول...عاد عندي صور تفصيليه حق هالوصفه ان شاء الله احطها بعدين اذا حبيتو :>


المقادير:
بصل
ثوم
ربيان طري
طماط مهروس
معجون طماط
بزار
هيل ناعم
كمون
زنجبيل بودر
فلفل اسود
لومي ناعم ولومي عدل
ورقه غار ( حسب الرغبه ومو ضروريه )
ماي ساخن
ملح
زيت
وطبعا جريش

الطريقه:
نحمس الجريش من غير دهن بس تشويح على نار لين يتغير لونه... انا ما احمره وايد اخاف يحترق .. بس المهم يقلب لونه وبعدين نغسله لان ما ينفع ينغسل قبل عشان لازم ما يكون رطب قبل التنهنه

ناخذ الربيان ونغسله ونشيل الخيط الاسود ونحطه على النار مع الفلفل الاسود والزنجبيل البودر و الثوم العدل وخلوه راهي وخلوه على النار لين ينزل الربيان مايه ويقارب النضج

نحمر البصل بالزيت ونحط عليه البزار والهيل الناعم واللومي ( واذا تحبون الكاري هم ضيفوه يعطي نكهه حلوه) وبعدين نضيف الربيان والمعجون وعصير الطماط والماي وورق الغار وننطره لين يغلي وبعدين نحط فوقه الجريش ونملحه ونحط اللومي ونخليه على نار لين يشرب مايه ويبقى مروق خفيف نغطيه بالقصدير ونخليه على نار واطيه لين يتفلفل عدل