ملف المقبلات والمشروبات اللذيذة والمميزة بالصور "متجدد دايما" ..

[شهود]

هالملف راح يكون بإذن الرحمن لجميع أنواع السلطات والمشروبات اللي نسويها بعزايمنا أو وجباتنا اليومية وضيافاتنا ، بتلاحظون منها مكرر لاني جمعت السلطات والمشروبات اللي بملف يوميات الفطور ومنها أنا منزلتها سابقا وضاعت الصور للأسف والأغلب جديد ومبتكر ..
وراح يحتوي على سلطات ومشروبات لذيذة وغريبة وسهلة بفس الوقت ، وطرق واقتراحات سواء للتقديم أو للإضافات الجانبية لها اللي تغير منها لتجعل من طبق السلطة الواحد طبقين مختلفين ..

وإن شاء الله هالملف يعجبكم ويفيدكم يالغلا ..

ومثل كل أطباقي كل القياسات المستخدمة من أكواب وملاعق قياسية ..





سلطة المعكرونة بالدجاج والذرة روعة والله ومميزة ولذيذة ..

المقادير:
2 صدر دجاج مقطع مكعبات "مسلوق ب4 حبات ثوم كاملة بدون دق وحبة بصل متوسطة بدون قص وفلفل اسود وملح بس"
كيس معكرونة ملونة مسلوقة "مسلوقة بملح وشوية زيت ومغسولة بماء بارد عشان نوقف استوائها"
1 ك خيار مقطع مكعبات
1 ك فليفلة خضراء مقطعة مكعبات
1-2 ك ذرة
3 ك خس مقطع صغير

صلصة السلطة:
3 م ك مايونيز
1 ك او علبة كريمة سائلة "انا استخدمت KDD"
1 علبة روب "زبادي"
1 م م ماسترد او خردل
1 م م بابريكا
1 م م فلفل اسود
1 م ك زيت زيتون
ملح
الطريقة:
نخلط المقادير كلها مع بعض ..





نخلط مقادير الصلصة ثم نصبها عليهم ..



نقلب حتى تحسين ان كل حبة اخذت من الصلصة..
واتركيها على طاولة المطبخ تتشرب الصلصة على الأقل نص ساعة ثم قدميها وبالعافية..








ملاحظة: كتغيير ممكن تستخدمين الروبيان المقشر بدل الدجاج "مع زيادة م م مستردة - خردل" أو انج تسوين الطبق كامل وتسوين دجاج وروبيان وتقدمين السلطة كل نوع بطبق يصير عندج سلطتين مختلفتين بنفس الوقت ..





دعواتكم لوالدي "أمي وأبوي" بالصحة والعافية وطول العمر ويفرح قلبهم فينا "عيالهم"..
ولي بالزوج الصالح الغني بدينه وماله وأخلاقه اللي يفرح قلبي آمــــــــــين..

السلطة شبه رومانية لذيذة وخفيفة ..

المقادير:
ك خس مقطع مكعبات
ك خيار مقطع مكعبات
ك طماطم مقطع مكعبات
1\4 ك نعناع مفروم ناعم
1\2 ك جبن ابيض مقطع مكعبات
1\2 ك زيتون اسود منزوع البذر

التتبيلة: 4 م ك زيت زيتون ، م م خل أبيض ، 2-4 م ك عصير ليمون ، م م فلفل اسود ، ملح ، م م نعناع ناشف

الطريقة:
اخلطي الخضار ثم ضيفي التتبيلة وقلبي جيدا ثم ضيفي الزيتون و الجبن وقدميها على طول..
وهذي صورتها..












متبل ألذ من اللذة وترى حلاته بالرمان ..

المقادير:
حبة باذنجان كبيرة "اللب تقريبا 1\2 ك"
2 م ك روب
2 م ك طحينية
1 م ص فلفل اسود ورشة ملح
فص ثوم مهروس ناعم
3 م ك عصير ليمون
1\2 ك رمان

الطريقة:
اشوي الباذنجانة على الغاز وقشريها اهرسيها بالشوكة ..





ثم ضيفي الثوم ثم الروب والطحينية والليمون والملح والفلفل ..





ثم ضعيه بطبق التقديم وزينيه بالرمان واتوصي "اللذة بالرمان" وصبي علية زيت زيتون..

سلطة الجرجير بالجبن والصنوبر لذيذة وخفيفة ..

المقادير:
5 ك جرجير قطعيه خشن جدا "مجرد تقطعين الورقة اثنين او ثلاث"
3\4 ك طماطم شرائح رفيعة "وشيلي اللب اللين اللي فيه حبيبات"
1\4 ك رمان
1\4 ك أو 3 م ك جبن أبيض مقطعة مكعبات صغيرة
1\4 ك ريحان طازج مفروم
2 م ك نعناع طازج مفروم
1\4 ك زيتون أسود أسباني
3 م ك صنوبر مقلي ومبرد "اختياري"
2 م ك مكعبات جبن رومي للوجه "اختياري"

التتبيلة:
1\4 ك زيت زيتون + 1\4 ك أو 3 م ك خل أبيض + 1\4 ك عصير ليمون + م ص فلفل أسود + ملح + م ص بابريكا + م ك سماق + م ش سكر

الطريقة:
اخلطي المقادير وصبي التتبيلة وقلبي ثم رشي الجبن والصنوبر على الوجه ..



وهذي عند التقديم وبالعافية ..





سلطة الخس والجزر والزيتون..

المقادير:
2 ك خس مقطع شرايح
ك جزر مبروش خشن
ك خيار مبروش خشن
1\4 ك نعناع مفروم ناعم
1\2 ك زيتون أسباني أسود شرائح

التتبيلة:
3 م ك زيت زيتون ، 4 م ك عصير ليمون ، م ك سماق ، ملح ، م م نعناع ناشف

الطريقة:
اخلطي المقادير ثم اخلطي مقادير التتبيلة ثم صبيها عليها..





سلطة الطرطور ، رهيبة مع السمك بأنواعه ..

المقادير:
1/2 ك طحينية " طحينة أو هردة"
1 ك روب
1/4 ك بصل مفروم ناعم "الاحلى البصل الأخضر وممكن الاثنين"
1/2 ك طماطم مفروم خشن ، وممكن خلط بقدونس معهم
1/4 ك عصير ليمون
م ص فلفل اسود وملح



الطريقة:
اخلطي اول شي اخلطي الطحينة مع البصل والروب والليمون "عشان ما ينهرس الطماطم من كثرة التحريك"





ثم ضيفي الطماطم والفلفل الاسود والملح..



وقدميها مع رشة بقدونس وبالعافية ..





سلطة الجرجير بالرمان "لذيـــــــذة بطريقة مو طبيعية أول ما تنحط على السفرة يقضون عليها ما شاء الله من لذتها "..

المقادير:
4 ك جرجير "مقصوص العرق فقط"
1 ك حبات الرمان

التتبيلة:
1 م م دارسين ، 1 م م فلفل أسود ، ملح ، 1 م م بابريكا ، 1\4 ك دبس الرمان ، 1\4 ك ليمون ، 1\4 ك زيت زيتون

الطريقة:
تخلط التتبيلة في وعاء بروحها ونصبها على الجرجير "وإذا ضفتي الرمان اخلطيها بس حاولي تخلينها باينه ، وشوفي الألوان والطعم" قبل التقديم ب10 دقايق أو أقل عشان ما يذبل وتقدم..

[chefadel55]

الله يبارك فيكى