تحديث مستمر
طريقتان لعمل كعك العيد ونصائح لنجاحه (صور)
الطريقه الأولى بالسميد الخشن
[b]
المقادير:
العجين:
4 كوب سميد خشن
1 كوب سمنة سائحة لحد كوب ونص حسب حاجة السميد
4 ملعقة كبيرة حليب بودرة
2 ملعقة صغيرة محلب
1/2 ملعقة صغيرة مستكة
1 ملعقة صغيرة خميرة
1 كوب ماء دافئ
1 فنجان صغير سكر
الحشوة:
التمر:
اوقية تمر مطحون
1 ملعقة صغيرة محلب مطحون
2 ملعقة صغيرة بهارات كعك
1/2 اصبع زبدة 50 غم
الطريقة:
1) نضع في وعاء السميد ونضيف السمنة (بعد ما نسيحها على نار هادئة) وبنخلطها مع السميد بطريقة الفرك وليس التعجين يعني بتحطي السميد بين ايديكي وبتصيري تفركي فيه او بتفركيه بأصابعك وبتخلطي هيك لتتوزع الزبدة على كل الخليط وبتغطيهم وبتتركيهم مدة يوم كامل لحتى يتشرب السميد السمنة
2) بنضيف المحلب والمستكة والحليب والسكر على السميد (هلأ أنا حطيت فنجان سكر صغير ازا بدك اياه أحلى زيديه شوي وممكن ما تحطي سكر بالمرة وتحطي على وجهه سكر مطحون) وبتحركيهم مع بعض ليختلطو مع بعض
3) الخميرة تذوب في الماء الفاتر مع نص ملعقة صغيرة سكر وتترك 5 دقائق
4) هلأ المي بنصير ندير منها شوي شوي عالسميد وبنفرك بأطراف أصابعنا مو تعجين متل العجين انتبهو لهاد الشي لأنه ازا تعجين رح يطلع يابس الكعك ... هلأ مو شرط نستخدم كل المي .. انه بنضل نعجنها لنحصل على عجينة متماسكة وبس ما بنزيد مي كتير لأنه كمان المي الكتيرة بتطلع الكعك يابس وبس تجهز بنغطيها بنايلون المطبخ وبنتركها 10 دقايق لثلث ساعة ترتاح
5) هلأ بالنسبة للحشوة وهي طبعاً لازم تكون محضرة من قبل ما نعجن عجينة الكعك .. بنخلط مقادير حشوة التمر مع بعضها وبنعجنها منيح لنحصل على عجينة طرية
6) هلأ بالنسبة لتشكيل الكعك بتقطعي من العجينة كرة بالحجم يلي بيناسب الكعكة يلي بدك تعمليها وعجوة بيكون حجمها مناسب للعجينة وتعملي كعك دائري
وبايدك بتعمليها بتشكليها على شكل اصبع متل اصابع الكفتة يعني وباصبعك الابهام بتفتحي فتحة
وبتحطي العجوة وطبعاً كمان بدك تكوني عاملتيها على شكل أصابع
وبتسكريها
وعالطاولة أو في الصينية بتصيري تمديها
وبعدين بتعمليها حلقة وبتوصلي الطرفين مع بعض
وبترتبيها وبتزبطي شكلها
وبتنقشيها بملقط الكعك
أو ممكن تفرديها على ايدك وتفردي العجوة وتحطيها وتسكريها منيح وبنتعملي باصبعك فيها فتحة من النص وبتزبطي شكلها وبتنقشيها بملقط الكعك
7) وبتعملي فيهم هيك لتخلص كل الكمية وأهم شي انه عجينة الكعك ما تتكشف عشان تضل طرية .. يعني بتضلي تاخدي منها شوي شوي وبترجعي بتغطيها لتخلص والكعك يلي بتجهزيه بتصفيه بسدر وبتتركي مسافة 2 سم بين كل كعكة وكعكة
8) بنخبزه على نار أقل من الوسط بشوي ازا حطيناه فوق النار مباشرة .. أو نار متوسطة ازا حطيناه بالطبقة التانية فوق النار يعني مو على الصاجة يلي مباشرة فوق النار يلي بعدها وبنتركه ليتحمر من تحت بس مو يتحمر كتير .. خفيف كتيييير يعني ... شوفوا هاي الصورة للكعك بعد ما تحمر من فوق ومن تحت .. طبعاً الكعك لما بديت أحمره من فوق كان لونه من تحت أخف من هيك .. وبس يتحمر من فوق بياخد من تحت كمان لون زيادة
وبس يتحمر من تحت بنطلعه وبنحمر وجهه ... وبس يطلع من الفرن رح يكون طري لهيك اتركيه شوي بالسدر يعني شي ربع ساعة وبعدين انقليه على شي تاني حتى يبرد وبس يبرد منيح حطيه بعلبه محكمة الاغلاق
ملاحظة: يمكن اضافة قرفة أو حب هيل مطحون كنكهة في حشوة التمر
في حال عمل كميات كبيرة أضيفي زيت قلي ذرة مع السمنة ... يعني لو كنتي بدك تعملي 16 كوب سميد بتحطي 3 -5 كوب سمنة وكوب زيت
نصائح للكعك:
هاي النصائح أنا حكيت بعضها خلال الشرح بس هون للتأكيد:
وصحتيــــــــــــن وعافيــــــــــــــة
الطريقه الثانيه بسميد ناعم ( الفرخه)
المقادير:
العجين:
3 كوب سميد ناعم الفرخة
1/2 كوب طحين
رشة ملح
250-300 غم زبدة أو سمنة ... تقريباً كوب لحد كوب وربع سمنة سايحة
4 ملعقة كبيرة حليب بودرة
2 ملعقة صغيرة محلب
1/2 ملعقة صغيرة مستكة
1/2 ملعقة صغيرة خميرة
1 كوب ماء دافئ
1 فنجان صغير سكر
الحشوة:
التمر:
اوقية تمر مطحون
1 ملعقة صغيرة محلب مطحون
2 ملعقة صغيرة بهارات كعك
1/2 اصبع زبدة 50 غم
الفستق الحلبي أو الجوز:
1.5 كوب فستق حلبي أو جوز مطحون
3/4 كوب سكر ناعم
2 ملعقة كبيرة ماء زهر
الطريقة:
1) نضع في وعاء السميد والطحين ورشة ملح ونضيف الزبدة (يجب أن تكون في درجة حرارة الغرفة سائحة) وبنخلطها مع السميد بطريقة الفرك وليس التعجين يعني بتحطي السميد بين ايديكي وبتصيري تفركي فيه او بتفركيه بأصابعك وبتخلطي هيك لتتوزع الزبدة على كل الخليط وبتغطيهم وبتتركيهم مدة يوم كامل لحتى يتشرب السميد الزبدة
2) بنضيف المحلب والمستكة والحليب والسكر على السميد (هلأ أنا حطيت فنجان سكر صغير ازا بدك اياه أحلى زيديه شوي وممكن ما تحطي سكر بالمرة وتحطي على وجهه سكر مطحون) وبتحركيهم مع بعض ليختلطو مع بعض
3) الخميرة تذوب في الماء الفاتر مع نص ملعقة صغيرة سكر وتترك 5 دقائق
4) هلأ المي بنصير ندير منها شوي شوي عالسميد وبنفرك بأطراف أصابعنا مو تعجين متل العجين انتبهو لهاد الشي لأنه ازا تعجين رح يطلع يابس الكعك ... هلأ مو شرط نستخدم كل المي أنا استخدمت تقريباً 3/4 الكوب .. انه بنضل نعجنها لنحصل على عجينة متماسكة وبس ما بنزيد مي كتير لأنه كمان المي الكتيرة بتطلع الكعك يابس وبس تجهز بنغطيها بنايلون المطبخ وبنتركها 10 دقايق لثلث ساعة ترتاح
5) هلأ بالنسبة للحشوة وهي طبعاً لازم تكون محضرة من قبل ما نعجن عجينة الكعك .. بنخلط مقادير حشوة التمر مع بعضها وبنعجنها منيح لنحصل على عجينة طرية وبالنسبة للفستق بس بنخلطهم مع بعض وازا احتجنا ماء زهر بنضيف لتطلع عجينة مع بعض
6) هلأ بالنسبة لتشكيل الكعك
7) وبتعملي فيهم هيك لتخلص كل الكمية وأهم شي انه عجينة الكعك ما تتكشف عشان تضل طرية .. يعني بتضلي تاخدي منها شوي شوي وبترجعي بتغطيها لتخلص والكعك يلي بتجهزيه بتصفيه بسدر وبتتركي مسافة 2 سم بين كل كعكة وكعكة
8) بنخبزه على نار أقل من الوسط بشوي ازا حطيناه فوق النار مباشرة .. أو نار متوسطة ازا حطيناه بالطبقة التانية فوق النار يعني مو على الصاجة يلي مباشرة فوق النار يلي بعدها وبنتركه ليتحمر من تحت بس مو يتحمر كتير .. خفيف كتيييير يعني وبس يتحمر من تحت بنطلعه وبنحمر وجهه كمان خفيف ... وبس يطلع من الفرن رح يكون طري لهيك اتركيه شوي بالسدر يعني شي ربع ساعة وبعدين انقليه على شي تاني حتى يبرد وبس يبرد منيح حطيه بعلبه محكمة الاغلاق
وصحتيــــــــــــن وعافيــــــــــــــة
ضوابط المشاركة
رد مع اقتباس
المفضلات