موضوعي هذا بطرح فيه شروط المكياج الناجح

اذا توفرت في الوجة .. راح يعطيكي وجه جميل

وهو سر من اسرار نجاح المكياج

بالنسبة للمكياج ... ماراح اتعمق في كيفية وضع

المكياج المحترف لانه بصراحة يبغالها اقل شيء

مهارة ... وبالاخص يبغالها ممارسة .. تغلطي

مرة ومرتين وبعدها بتتعلمي ... لكن بعطيكم

اشياء مهمة لازم تتوفر اثناء وضع المكياج ...


ماراح اطول عليكم .. اقرأو الموضوع للأخير

واكيد بتستفيدو وكلامي مدعم بصور


بس قبل اخوض بموضوعي عندي نقطة جدا جدا

جدا

مهمة ويجب مراعاتها

- وكتبتها بلون مختلف لأهميتها

راعي ... اختيار المكياج المناسب في الوقت

المناسب .... يعني مكياج النهار يختلف

جذريا

عن مكياج الليل ... مرة رحت مجلس

الامهاااات

في الصباح بصراحة لعب في الوجة كانه

علبة الوان ... والمصيبة انه اغلبهم ما

يعرفوا يحطوا

مكياج ... طيب ما تعرفي لا تحطي مكياج

كثير

وتضحكي الناس عليكي ... او تكوني محطة

انتقاد

حتى لو كنتي محترفة في المكياج .. ابد ابد

ما ينفع مكياج كثير بالصباح وحتى

المعلمات كأنهم رايحين سهرة .... لا وكمان

الاضاءة حدث ولا حرج ... اضاءات بالوجة

وبكل مكان ...

ورسمة العين ماشاء الله من الطرف للطرف

زي زينب العسكري ... شيء مقرف وربي

على

الصبح تشوفي هذي المناظر ... على بالكم

حلو ؟؟ لا والله مو حلو ... لازم الواحد يعمل

مكياج

مريح للنظر وما يزعج الباقين .. يعني لو

رسمة عين خفيفة وماسكارا وروج ناعم

وبلاشر خفيف

بيعطي شكل حلو ومريح للنظر ...مثل هذي الصورة





وفي ناس بتعمل زي هذا المكياج على

الصبح ... شيء مقرف والله وانا بنفسي

شفت معلمات بيعملوا زي كذا







وخذوها قاعدة

<الحلو حلو لو دوبة صحي من النوم.. والوحش

وحش لو يغسل وجه كل يوم>

والحلا لا يتكمن في ملامح الوجة فقط؟... بل في

صفاء البشرة ايضا ونعومتها ... والحواجب

المرسومة صح



نبدأ بأول سر من اسرار نجاح المكياج


الحواجب ...

يقال انه الحواجب مرآة العين .. لكن انا اشوف

انه الحواجب مراة الوجه بأكمله... يعني لو ما

تحطي مكياج بس راسمة حواجبك صح ...

خلاص يكفي

... انا في نظري بشوف انه الحواجب نص

المكياج ..

في ناس تحب ترسم حواجبها عريضة وبعضهم

نحيفة وبعضهم على شكل 8 ... كل رسمة على

حسب الوجة لكن لازم يكون الرسمتين قريبة من

بعض وبلون يناسب لون شعرك .. يعني شعرك

بني فاتح يكون قلم الحواجب بني فاتح ... واذا

شعرك بني غامق برضة بيكون القلم بني

غامق .. واذا شعرك اسود انتي مخيرة بين اللون

البني الغامق او الاسود بس انا افضل البني

الغامق ..

بالنسبة للبيت في متزوجات ما يحبوا يحطوا

مكياج في البيت بيحبوا كل شيء طبيعي ... طيب

على راحتك لا تحطي مكياج بس لازم ترسمي

حواجبك ... لأنه زي ما قلت هو نص المكياج ...

بقرب لكم مثال تعرفوا مسلسل رمضان <زهرة

وازواجها الخمسة؟> اول ما طلعت لما كانت

فقيرة بدون مكياج بس اساس واضاءة خفيفة

المهم ... شفتوا كيف حواجبها ؟؟ مع انها مو

حاطة مكياج .. اعطاها وجه جميل ... مثل هذي

الصورة





وفي طريقة كمان حلوة عشان تعطي تحديد قوي

للحواجب وهو الاضاءة اللي بتحطيها تحت

الحاجب

تجي الاضاءة على شكل سائب او قلم .... اللي

بيناسبك بس المهم الشطارة والفن في وضع

الاضاءة ... بصراحة هو ما يبغالها شطارة ...

يبغالها دقة نوعا ما لا تكثري ويكون شكله

مزعج ولا تقللي ما كأنك حطيتي شيء

مثل هذي الصورة





او هذي الاضاءة تحت الحاجب



اضغطي هنا لمشاهدة الصورة بحجمها الأصلي






انا عن نفسي استخدم اضاءة فور ايفير

رووووعة مثل هذي الصورة
***




عندي لون لولي ... مايل على ذهبي .. نفس هذي الدرجة روعة

وسعرة حلو ويجلس معاكي مئات السنين تقريبا

سعره في الاربعينات ... وتلاقوها بأي محلات

التجميل انا اشتريها من العيسائي بجدة مجمع

الشرق ... وكمان تلاقيها في محل ديبنهامز

واظن كمان سيتي بلازا


بعد ما ترسمي حواجبك ... خذي فرشة صغير ة

زي اللي في الصورة واغمريها بقليل من الاضاءة وحطيها تحت الحواجب


بس لا تمسحي ...لا لا ... طبطبي عليها عشان

يتركز اللون بس لازم قبلها تكوني حاطة كريم

اساس عشان يمسك الاضاءة تحت الحواجب ...

واذا ما عندك فرشاة حواجب استخدمي اعواد

الاذان ... ويفضل يبلل بنقطة موية وتحطي فوقها

الاضاءة او بلاش موية .. بس الغرض من الموية عشان

تمسك الاضاءة بشكل افضل

واذا كنتي بالبيت وما بتطلعي .. مو لازم اصلا

تحطي اساس .. لأنه بتضطري تغسلية وقت كل

وضوء .. يعني بيكفي الاضاءة هذي ... انا

بالبيت ما احط اضاءة فور ايفر ... عندي قلم

لونه لولي ارسمة تحت الحواجب وارجع اوزعه

بأصبعي ...يعطي شكل طبيعي جدا ... يعني اذا

بتخرجي أي مكان ... لازم رسم حواجب صح ...

واضاءة تحت الحواجب تحدد رسمة الحواجب

باكثر دقة وهذي نقطة مهمة بالوجة


العين ..

اهم مافي الوجة ... هو العين ... وعندي نصيحة

ذهبية لا تقدر بثمن ... اللي ما تعرف ترسم

عينها لا تغامر وتخبص وتلعب بالألوااااان يقال

انها تعرف تحط مكياج... نصيحة يا بنات .. والله

كثير بنات .. كثر شعر الراس .. ما عندهم فن

رسم العين وبس تجي مناسبة وتعمل عيونها ..

بصراحة ودك تروح المغسلة تغسل وجهها ...

يعني وجهها بدون مكياج افضل مليون مرة من

اللعب في العين ..

مو مشكلة يا بنات للي ماتعرف ترسم عينها ...

لا ترسم بالعكس المكياج السمبل ارقى واحلى ..

يعني صح مكياج الاوفر افخم .. لكن السمبل

ارقة وانعم ويعطيكي سن اصغر ... انتي اعملي

اسرار المكياج الناجح اللي اتكلمت عنه ورسمة

عين خفيفة .. بيعطيكي شكل ارقى ... وانعم

لو تركزي في عارضات الازياء الاوروبيات بس

يرسموا حواجبهم ورسمة خفيفة للعين مع تركيز

الاضاءات <اهم شيء عند العارضات

الاضاءات> ويطلع شكلهم جونااااااااااااااان

اللي ما تعرف ترسم عينها بعطيكي خطوات

سهلة وبشكل احلى حتى تصير يدك خفيفة على

الرسم... خذي فرشاة مكياج عريضة لتوزيع

الظل ... وارجع اركز عريضة لا تاخذي النحيفة

او اللي تجي شكل اسفنج؟؟ لأنه العريضة تقدري

توزعي الظل بشكل اسرع .. لكن النحيفة ما

تقدري توزعي فيه الظل وحتى كمان الاسفنج

تلاقي صعوبة بالتوزيع

الفرشاة العريضة زي هذي اللي في الصورة

وابتعدي عن النحيفة ..او

الاسفنج





لأنه الافضل لتوزيع الظل هو الفرشاة

العريضة ... اوكي يا حلوين ...؟؟

لو مثلا تبغي يكون الظل اورنج او برونزي ....

راعي انه يكون لون الظل مع احمر الخدود

<البلاشر> نفس

اللون ... او ممكن من نفس لون البلاشر تاخذي

منه للظل ... والله يعطوكم لون حلو .. وشكل

حلو ... تحسي انه في شيء مخلي شكلك حلو

ومو عارفة ايش هو ؟ بس السر هو التناسق

بين لون الظل والبلاشر .. اللي ما تعرف تدمج

الوان الظل مو ضروري تلعب بعيونها بيكفيها

لون واحد .. انا عن نفسي اوقات كثيرة بحط لون

ظل واحد< مع اني اعرف ادمج الالوان > وقليل

مع اطرافة لون افتح شوي ومو ضروري كمان تحطي درجة افتح

من الاطراف... وطبعا لا تنسي تحطي

تحت الحواجب الاضاءة ... واذا


تبغي تتأكدي من صحة مكياج عيونك

خذي مراية صغيرة وطالعي بنص وجهك ..

عشان تشوفي اذا المكياج مرتب ومو خارج على

برة ...

نجي لرسمة العين ... رسمة العين سهلة جدا

اما بقلم تحديد عادي او أي لاينر .. لازم تاحذي

قلم تحديد وسط يعني لاهو سائل ويخرب المكياج

ولا جاف رخيص يجرح العين ... المهم ارسمي

على حدود العين بدون زيادة ولا نقصان مثل

هذي الصورة<انا احب ارسم بقلم تحديد اكثر من

الاي لاينر>







بعدها ارسمي بشكل اعرض شوي .. عشان لا

يخرب المكياج ... مثل هذي الصورة






وفي ناس تحب تكتفي برسم خط رفيع جدا وهذا

راجع للذوق الشخصي ... المهم نكمل بعد ما

تخلصي رسم العين .... خذي فرشاة اللي تجي

بشكل اسفنج وهذي مهمتها توزيع القلم الاسود

عشان يطلع بشكل طبيعي ... ناخذ الاسفنج

ونبللة بالموية شوية ونرجع نغمرة بالظل الاسود

ونحطة فوق رسمة القلم اللي رسمناه اول ...

ونطبطب الظل الاسود على القلم الاسود اللي

رسمناه ونحاول ندمج نوعا ما ... ويعطي شكل

مدموج واعرض قليل مثل هذي الصورة








وبعدها الماسكار ... ولا تتجاهلو المسكارة لأنها

بتبرز

كل شيء عملتوه في العين ...


الروج..

شروط الارواج الناجحة ... ما تكون رخيصة او

محلات المكياج الرخيصة ... اولا: لانها بتسمر

الشفايف وهذا معروف من زمان .. ثانيا: سمعت

انه يسبب السرطان والعياذ بالله ... يعني يفضل

الابتعاد عنها ... في ماركات غالية وماركات

معقولة ...

شانيل وجفينشي وديور .... توصل اسعارها

تقريبا فوق ال 70 ريال ...

وفي ماركات ارخص مثل فورايفير وماكس

فاكتور ونيفيا .. اسعارها في ال 40 ريال

تقريبا ...

وكلهم حلوين ... وغير كذا الالوان غنية ومشبعة

وحلوة ... طبعا الالوان تختاريها مع مراعاة

مكياج العين

يعني لو مكياج عينك خفيف تحطي روج غامق

او بالاصح صارخ ...والعكس صحيح ...
لازم تغامري بالالوان ...

انا كنت اشوف ناس دايم الروج موحد
اما لون وردي او برونزي يحطوة

بجميع الحالات

مهما اختلف رسمة العين والالوان والمناسبات...

الروج ما يغيروة وما يهتموا بتغيروا.. طبعا كذا

مو حلو .. مو حلو التقيد بلون واحد ..


نرجع لموضوع الوان الارواج ... وحب المغامرة

روج احمر


روج برتقالي
اضغطي هنا لمشاهدة الصورة بحجمها الأصلي

وردي


احمر داكن


فوشي








عندي ملاحظة ... اذا اشتريتي روج وما عجبك

لونه لا ترمية ... اخلطي معاه الوان ثانية

وبيطلع رووووووووووعة


تحديد الانف ...

هذي الحركة خطييييييييييييييرة .... وتعطيكي

انف كالسيف ... وحتى اللي انفها واقف تعملو

عادي والله

يجنن ويغير شكلك جذريا للأحلى طبعا .. على

حسب ثقل التحديد

وهذا اللي تعملوا حليمة بولند دايم نشوف تحدد

انفها بظل بني غامق كأنه سيف ويعطي صغر

للأنف .... جربوة مرة روعة

طريقة التحديد




موضح بالصورة ... بعد ما تحطي اساس ارسمي

بنفس هذي الفرشة بلون بني على نفس الصورة

الموضحة وبعد ما تخلصي ... وزعيه بأصبعك

شوية

بس انتبهي لا تخففي اللون وما كانك سويتي

شيء

وهذه صورة نهائية لتحديد الانف




اوووكي يا حلوين ؟؟


توزيع احمر الخدود <البلاشر>

معروف انه كل وحدة تحط اساس في وجها

يختفي جميع الملامح يصير كانه الوجة قطعة

وحدة بدون ملامح ... والبلاشر طبعا ما ينحط

في الخدود فقط ... لا لا ... لازم تحطي على

الجبين والانف شوي والذقن .. حتى ترجعي

تحددي ملامحك من جديد ... لانك لو حطيتية

بس في الخدود ..كانه في شيء غلط في وجهك

ومو عارفة ايش هو .. تحسي ما اتوضحت

ملامحك .. واذا تبغي تتأكدي من صحة كلامي ..

انتي جربي نفسك وشوفي الفرق .. لما تحطي

بس البلاشر على الخدود فقط .. او لما توزعيه

على كافة الوجة


توزيع الاساس ...

انا من رأي اللي بشرتها حلوة وصافية بلاش

اساس بس تركز الاساس على العين واسفل

العين عشان يثبت الظل .. وتحط بودرة

مضغوطة او عادية

واللي وجهها مشعر ... تنتبه لا تقرب الاساس

من جهة الحواجب او جهة الاذاني ... لأنه

الاساس ما بيتوزع صح يبين كأنه طبقة بيضاء

وشكلة وحش مرة

مع وجود الشعر شكلة بايخ ...

واللي وجهها فيه حبوب ... يفضل ما تحط

اساس كثير

لانه بيبقى كمية الاساس على رؤس الحبة كأنها

نقطة بيضاء ... وشكلة ملفت وبايخ ... ويفضل

تحط البودرة

المضغوطة او الجافة ...


توزيع الاضاءات ...

يفضل اختيار الاضاءات الذهبي او اللولي .. لا

تختاروا الفضي مو حلو ابد ... لأنه بيعطي

اضاءة مو طبيعية كانه قالب على رمادي ...

وخاصة لما تكون الوحدة بشرتها سمرة وتحط

فضي ... يقلب على رمادي ...

لكن الذهبي واللولي يعطي لون طبيعي .. حتى لو

كان اكسسواراتك فضي .. عادي حطي اضاءة

ذهبي ..ما صارت الناس تتقيد زي اول ..

طريقة التوزيع ... يوزع على الجبين باصابعك

بس لا تكثري ... وعلى الانف بشكل مستطيل ...

وعلى الذقن

وعلى العطمة الخد اللي تحت العين وبس


نصائح ذهبية لمكياج رائع

- لازم تكون اللمبات عندك قوية ويفضل اللون

الابيض ... عارفين ليش ؟؟ عشان تقدري

تشوفي

العيوب وتخفيها مع اللمبات البيضاء ... وعشان

يكون توزيعك للمكياج متساوي وما راح يبان الا

باللمبات البيضاء ... ولنفرض انك عملتي

العكس

وعملتي مكياجك بلمبات صفرا ... اكيد بيطلع

مكياجك روعة ... لكن لو رحتي لاي احد ولمباته

بيضاء والله بتنفجعي ... انواع العيوب ومكياج

غير متقن .... لذلك يفضل عملة بلمبات بيضاء

يصير حتى لو رحتي عند احد ولمباته صفراء

بيطلع المكياج اروع مما عملتية ...


-اضاءات الوجة خليها لونه ذهبي او لولي ..

وابعدي عن الفضي لانه بيعطي على لون رمادي

خاصة اذا كنتي سمراء

-خذي جميع مكياجك ماركات معروفة ومضمونة

او اقل شيء طبي ... لا تاخذي رخيص يخرب لك

بشرتك او شفايفك



- خذي كريم اساس افتح من وجهك بدرجة او

درجتين ... لا تاخذي فاتح مرة وانتي بشرتك

سمراء .. لأنه بيقلب رمادي او لون رصاصي

انتبهوا لهذي النقطة مهمة جدا


-اذا ما تعرفي تسوي مكياج لعينك حق سهرة
خلاص ابرزي المكياج بروج صارخ يعني
غطي عيب بشيء اخر.. او حطي بلاشر مركز لونه
- واخيرا ... المهارة والاحتراف سر من اسرار

نجاح المكياج .... في بنات مكياجهم مرة خفيف

بس تحبي تطالعي في وجهها في شيء محلي

وجهها ... وتكتشفي انه السر في توزيع الاضاءة

والبلاشر والمغامرة في اختيار الارواج الصارخة

زي عارضات الازياء الاوروبيات مكياجهم

خفيف

بس راقي جدا ورووووعة

وفي بنات مكياجهم كثيف وكثير بس فوضوي او

مافي فن تبغى بأي طريقة تصير محترفة ... ومو

عارف كيف؟؟ يفضل انها ما تغامر بالمكياج لأنه

بيعطي شكل سيء للوجه ... انا عندي الوحدة

تحط مكياج خفيف وحلو .. ولا مكياج كثير وبايخ

وملخبط

واتمنى استفدتوا من موضوعي ... وصدقوني

مع الممارسة راح تحترفي بكل بساطة ... انا ما

كنت اعرف ارسم حواجبي او حتى احط ظل ....

لكن لأني منجد نفسي اتعلم... صرت اغلط واتعلم

من اغلاطي .. وما اعيد نفس الغلط وعرفت

الشيء اللي بيناسب وجهي ...

رجاء يا بنات اذا عجبكم الموضوع قولوا <ماشاء الله تبارك الرحمن>

ودمتم طيبين