محشى الممبار من احلى و اسهل انواع المحشى

\و طريقته سهله جداً و بسيطه تعالوا نشوف حنعمله ازاى .... اعذرونى انهارده حتكلم بالعاميه مش حاعرف اتكلم عن الممبار بالعربيه الفصحى
- للخلطه :
1\2 كيلو ممبار
حوالى كيلو ارز مصرى مغسول و مصفى من الماء جيداً
3 بصلات كبار مفرومين
2 رابطه من ( بقدونس - كسبره - شبت ) مفرومين
750 جرام طماطم مفرومه
2 ملعقه كبيره ثوم مفروم
4 ملاعق معجون طماطم
للتوابل : الاساسى ملح و فلفل اسود و انا بضيف رشة ( بهارات - زعتر - كسبره ناشفه - كمون ) و شطه حسب الرغبه
1\3 كوب زيت ذره
** و نخلط كل مكونات الخلطه مع بعض و بتكون جاهزه للاستخدام
- نيجى بقى للمبار طبعاً هو بيبقى الجزار غسله بس احنا لازم نغسله تانى حناخده تحت الماء الجارى و نغسله كويس و بعدين نقلبه عشان نغسله من الناحيه التانيه حنثنى احد طرفيه على اصبعى الابهام و السبابه و نقلب ايدينا الناحيه التانيه و تحت الماء الجارى ندخله فى بعضه حنلاقيه اتقلب بسهوله
- و بعدين ننقعه فى ملح و خل و عصير ليمون و نسيبه شويه و نرجع نغسله تانى و نقطعه بالمقص لقطع بطول كف اليد
- حنبتدى نحشيه حنفتح احد طرفيه بالابهام و السبابه و نحشيه بالخلطه
- او ممكن نثنى طرفه على الابهامين و نحشى بسبابة اليد اليمنى
- حناخد كل اصبع بعد ما نحشيه و نبططه لسببين :
* الاول لازم ميكونش ممتلىء بالارز و الا حيفرقع و هو بيستوى عشان الارز حينفش و يضيع كل التعب لا قدر الله
* و التانى ان الارز يكون متوزع بالتساوى جواه فلما يستوى يبقى شكله منتظم مش حته تخينه و حته رفيعه
- و نرص فى اى صينيه لحد ما نخلص حشو
- بعد ما خلصنا حشو حنحضر حله كبيره و نصفى فيها باقى الخلطه بحيث ناخد السوائل بس و نزود مايه لحد نصف الحله
- و بايدينا الاتنين نمسك كل اصبع من الطرفين يعنى بكل ايد طرف عشان ميطلعش مقوس و نحطه فى الحله
- بعد ما نحط كل الكميه فى الحله نسيبه يغلى غلوتين و بعدين نظبط الملح فى المايه و نسيبه لحد ما يستوى الارز بعد 30 دقيقه نبتدى نشوفه حنطلع شويه ارز من قلب اى واحده و نشوفه استوى و لا لسه حيحتاج من 30 : 40 دقيقه
- بعد ما استوى حنطلعه فى مصفى
- ممكن بعد ما يبرد نحفظه فى الفريزر و عند الحاجه نطلعه و نسيبه يفك و بعدين نحمره
- عند التقديم يحمر فى الزيت ( مش بياخد وقت خالص )
- و نقدمه مع رشة ملح و فلفل اسود و نزينه بالبقدونس
و بالهنا