ازيكم يا قمرات
عملت شوية مخلللات كده و حبيت تشوفها مع الطريقة ان شاء الله تعجبكم
الاول حنشوف مخلل اللفت
و ده من غير اى اضافات احمر زى الورد
الاول اللفت لازم يكون احمر و حجمه صغير و تقيل ما تشتريش اللفتة الخفيفة بتبقى شايخة
ودى صورة من قريب


نغسله كويس و نقطعه حلقات



نقطع الحلقات زى البطاطس صوابع

نجيب ملح و شطة



نرش عليه الملح و الشطة و نقلبه و نسيبه من بالليل للصبح او العكس ودى تكة مهمة

الصبح حنلاقيه نزل ميته
حناخده بميته و نحطه فى برطمان

حنزود شوية ميه صغيرين عشان ياخد راحته زى مية الرز كده و ندوقها عشان نظبط الملح وربع كوب خل


نقفل عليه بكيس و نفتح بعد اسبوع


شايفين اللون ولا بنجر ولا غيره منه فيه احمر ايه رايكم

الليمون الاضاليا المعصفر


نجيب الليمون الاضاليا و يبقى حجمه وسط او كبير زى ما تحبى كل ما كبر كل ما قشرته كانت تخينة و بيبقى حلو فى الاكل

و نسلقه نص سلقة و نحط فى الميه شوية ملح يعنى ما نسبهوش يستوى خالص و نسيبه يبرد وما نرميش مية السلق



نكون محضرين عصفر و حبة البركة و ملح و شطة


نشق بالسكينة شقة صغيره و نحشيه من جوه بالخليط يجى معلقة كبيره لكل ليمونة


نرصه فى برطمان و الباقى من الحشو نحطه فى مية السلق و نملحها كويس و نحطها على الليمون
سبيه 3ايام و كلى احلى ليمون

مخلل الكرنب

دى كانت باقى كرنباية كنت حشيتها رز

قطعتها حتت صغيره حت الراس بتاعتها


قلبتها فى ملح و شطة
و سبتها من بالليل للصبح او العكس

نزلت ميتها و دبل الكرنب شايفين ازاى


فى برطمان نحط الكرنب بالميه اللى نزلت منه مع شوية خل و شوية ميه لو احتاج وابقى ظبطى الملح و ما تخليهوش مالح قوى خلى الملح زى ملح الطبيخ الحادق شويه
اسبوع و كلى الكرنب و ادعيلى

الكرنبيت

تجيبى كرنبيته صغيره و تقطعيها زى كده



هنا حطيت عليه فلفل حامى كنت فرماه فى الخلاط مع شوية زيت و ملح
و حطيت شوية ملح معاه و قلبته فيه وبرده سبته من بالليل للصبح ينزل ميته

هنا لما ميته نزلت



نحط الكرنبيت فى البرطمان و معاه ميته و نزود شوية ميه لو احتاج و ملح و منحطش خل خالص له


وبعد اسبوع ناكل منه
بصراحة اول مره اجربه و ادمنته طعمة خرافة و جربوه




مخلل الجزر




نجيب الجزر و نغسله كويس جدا و نقطعه صوابع






و نحطه فى برطمان ومعاه فصين ثوم مدقوق و شوية ملح و خل وميه






و سيبيه اسبوعين على ما ياخد ملحه و كلى منه







تجيبى الخيار و الفلفل و تغسليه

و ما تقطعيش الخيار زى ما هو
و شقى الفلفل بالسكينه عشان حميانه ينزل فى الميه




تحطيه فى برطمان و تحطى عليه ميه و ملح و شوية خل
4 ايام و كلى احلى مخلل خيار






نجيب الطماطم و نغيلها كويس و معاها كام فص ثوم وفلفل اخضر وشطة و كمون و فلفل اسود و ملح و خل وزيت
و لو تحبى شوية بقدونش مفروم




نشقها 4 بس مش للاخر زى الصورة و نحشيها
او
نعملها كده

حلقات و نحط الخلطة و الخل و الزيت
و دى بقى بموت فيها حبيبة قلبى خصوصا مع الكبده و الفلافل
و بتاكليها فى ساعتها يعنى مش بتستنى عليها




ودى مجموعة المخلللات مع بعض
وممكن لما يتخللوا تاخدى من كل صنف و تقطعيه و تخلطيهم مع بعض بشوية فلفل احمر مدقوق و كلى مخلل مشكل احلى من اى محل
يارب اكون قدرت افيدك يا قمرات
فى انتظار رايكم