في بيتنا مراهقة ..
عاوزة بنتك تبقى صديقتك وتحكيلك كل أسرارها وتعدي مرحلة المراهقة بهدوووء وسلام وبدون أي صعوبة عليكِ بالآتي ..
* بلاش تظهري أمامها بصورة الملاك البريء وإنك عمرك ما بتغلطي لإن ده أهم سبب يخليها تخجل من انها تحكيلك عن أخطائها وأسرارها وتعبرلك عن مشاعرها ..
*إوعي تستخدمي العنف معها بالتهديد أو العقاب بالضرب لان مع الوقت كل ده بيفقد تأثيره ويمكن يكون سبب لتماديها في الخطأ و الكذب عليكِ وكتمان أسرارها عنكِ خوفا منكِ ..
* استشريها وخدي رأيها في بعض أمورك البسيطة واحكيلها عن أسرارك وخاصة وأنتِ في سنها لكن ازاي حافظتي على نفسك وقيمك وأخلاقك .
* أحسن طريقة تنصحي وتوجهي بيها المراهقة انك تحكيلها قصص من الواقع و تضربي لها أمثلة حية ومواقف حقيقية تتعلم منها وتقلد الجيد وتتجنب السيء .
* اتعرفي على صديقاتها واعزميهم عندك في البيت وكوني لطيفة جداً معاهم هتشعر بالثقة والفخر بيكِ وهتبقى فرصة تتعرفي على سلوكهم ،أخلاقهم وبيفكروا ازاي ؟! وتوجهي بنتك بأسلوب غير مباشر تحافظ على صداقة مين وتبعد عن مين !!
* إوعي بنتك تشعر انك بتراقبيها ( رغم انك بتراقبيها فعلا مراقبة اهتمام ورعاية وليس تصيد للأخطاء ) لان المراهقة لو شعرت انها تحت الأنظار والمراقبة بتضعف ثقتها بنفسها وربما يكون دافع إنها تاخد احتياطتها وتخفي أمورها عنك ، لكن لو شعرت انك بتثقي فيها فلن تخون ثقتك أبدا وهتبذل كل جهدها انها تكون عند حسن ظنك ..
* اعملي لها مفاجأة كل فترة بهدية بتحبها أو محتاجاها ( في شنطتها ، دولاب ملابسها ، درج مكتبها )
* لا تكلفيها بأعباء كتيييرة تفوق قدرتها لان فترة البلوغ بتبقى فترة ثورة هرمونات ونمو جسدي سريع جدا فبتستهلك معظم طاقتها عشان كده بتلاقيها غالبا كسلانة وبتنام كتير ومش قادرة تعمل حاجة .
* قوليلها كل يوم كلمة حلوة مثلا أمدحي خُلق أو صفة جيدة فيها ، مرة في شكلها اهتمامها بنظافتها ، تسريحة شعرها ، ابتسامتها ، قوامها ، اي حاجة تكون حقيقية ولا تبالغي .
* صلوا مع بعض جماعة ولو صلاة واحدة في اليوم وشجعيها على المواظبة على الصلاة دائماً ، و علِّيّ عندها المراقبة و حب ربنا لإن الدين هو اللي هيحميها من أي خطأ أو خطر في الوقت اللي بتبقي مش معاها أو انشغلتِ فيه عن متابعتها .
* إوعي يفوت يوم من غير ما تاخديها في حضنك وتطبطبي عليها وتقبليها على جبينها، مهما كبرت وطولّت هي في حاجة نفسية شديدة لحبك وحضنك وحنانك . ..
منقول