. القواعد الأربعون للأم الدكتورة ..!<a href="https://www.lamsahfannan.com/?attachment_id=113625" rel="attachment wp-att-113625"><img src="//www.lamsahfannan.com/content/uploads/2017/09/20638625_223597948167236_3011626593052087510_n.jpg " alt="" width="650" height="448" class="alignleft size-full wp-image-113625" /></a>
١. مترضعيش صناعى ..!
٢. ادى ڤيتامين د من أول يوم وحديد م الشهر الرابع..
٣. متدّيش كالسيوم مادام بترضعى طبيعى أو صناعى ..
٤. الزبادى والجبنة ومنتجات الألبان من التامن آه عادى ،، الا لو فيه حساسية عائلية منهم ..!
٥. متأكليش قبل الرابع ..ومتدّيش لبن غير لبن الأم أو الصناعى قبل سنة.
٦. ابدأى بخضار وبعدين فواكه وبعدين صفار بيض و لحوم بيضا وحمرا كله مهروس مضروب خلاط!
٧. ابنك رافض الأكل ومعندوش شهية .. عادى ..!
٨. نوعى في الأكل ،، والنكهات ،، والخلطات ،، يوم ويوم ،، وادّى طبق يلغوص فيه وطبق تأكّليه منه واحده واحده..
٩. مافيش حاجه اسمها فاتح شهية.!
١٠. بلاش العصاير قبل ٦ شهور الا للامساك ،، من ٦ شهور-٦سنين ممكن والأفضل التفاح بالكوب مش الببرونه عشان تسوس الأسنان من ١٢٠ -١٧٠ مل حد أقصى يومياً .بعد ٦ سنوات ١/٣ لتر يومياً فقط،، والثمرة أفضل من العصير .
١١. المياه عند ٤ شهور ولبن الأم كافى جدا(٨٧٪مياه)..!
١٢. المغص والارتجاع طبيعى جداً اول ٤ شهور ،، ادّى سايميثيكون و"كرّعى" البيبي مرتين كل رضعه، ونيمى البيبي ٤٥ درجه " مرفوع الراس والصدر" بعد الرضعه لمدة نصف ساعة....
١٣. مش بنخاف من الارتجاع عند البيبيهات الا لو الوزن مش بيزيد او الزّن ليل نهار او عمل التهابات رئوية ..!
١٤. الترجيع فى السن الأكبر شوية بنعطى ابرة ترجيع ( دانسيت او زوفران وبلاش برمبران) ،، ومحلول جفاف ونكشف طبعاً.
١٥. متدّيش انتينال .
١٦.الترجيع الخطير هوا اللى بيبقى معاه دم أو مستمر أو معاه جفاف شديد أو تشنجات أو ألم رهيب بالبطن..
١٧. الإسهال الخفيف اللى بيقعد يوم او يومين ومش بيعدى ٥ مرات في اليوم ومش سايل تماماً غالباً تسنين او من كتر السوايل او ادخال نوع اكل جديد ،، لا مش محتاج علاج ..!
١٨. روشته سريعه :
الإسهال أيّاً كان نوعه علاجه محلول جفاف ونانازوكسيد وسلفوزنك ،، لو في دم هنزود سبترين او سيبروفلوكساسين.
١٩. متديش كابكت ولا سمكتا ولا عاوزين الاسهال يقف سيبيه يطرد الخلايا الملوثة من الامعاء وماتحبسيهاش،، وعوضى من فوق بمحلول الجفاف متعلقيش محاليل..!
٢٠.مبنعلقش محاليل الا لو الطفل بيرجّع كل حاجه حتى محلول الجفاف رغم المحاولة ٣ مرات والصبر ساعه ورغم ابر الترجيع ..!
٢١. مبنعلقش محاليل
٢٢. مبندّيش أنتى بيوتك
٢٣. الإمساك كتر أوى !! متغيريش اللبن الصناعى كل شوية ،، وخدى بالك من انواع الأكل عند بداية الفطام ،، المعدة والأمعاء ساعات مبتستحملش !
٢٤. روشتة الإمساك :
زيت الخروع ،، الملينات ( لاكتيولوز وبيكولاكس)،،لبوس الجلسرين..! بس كده ،، الجرعات والمتابعه مع طبيبك الخاص..!
٢٥. قشر اللب بيعمل امساك رهيب وأحياناً انسداد معوى ..!
٢٦.الإمساك الخطير هوا الّى معاه دم في البراز أو ترجيع مستمر مع ألم في البطن ..
٢٧. مفيش حاجه اسمها شربة فلاجيل ومعلقتين مطهر معوى ،، في تحليل براز وعلاج بما يرضى الله..
٢٨. مين فينا معندوش أميبا ( متحوصلة ) !!،، مش بندّى فلاجيل الا لو نشطة ( vegetative) أو معاها الم بطن او امساك او اسهال..!
٢٩.مافيش حاجه اسمها انتى بيوتك عشان الواد سخن
٣٠. سُخن ؟؟
كشفت كويس ؟؟ شفت الحلق والأذن والأنف وسمعت الصدر ؟؟ استبعدت النزلة المعوية و التهاب المخ ؟؟
تمام ،، اسحب تحليل بول وصورة دم كاملة ،،
لأ ،، متدّيش أنتى بيوتك ،،
٣١. سُخن ؟؟
اديتيله خافض؟؟ عملتي كمادات ؟؟ حمّيتى الواد ؟؟ اديتي لبوس ؟؟ هويتى الأوضه ؟؟ خففتى اللبس ؟؟
تمام ،، روحى اكشفى فوراً
٣٢. ابنك بيكُحّ كتير ؟؟
كتير أوى ؟؟ ،، بابا وقف السجاير وماما وقفت البيرفيوم والبخور والغبار وهيا بتنضف البيت ولسه بيكح ؟؟ معاه نهجان او تزييق في الصدر وبيتكرر كتير وبيزيد في الشتا ؟؟ وابن خالته صدره بيتعب على طول؟؟
هوا وابن خالته عندهم حساسية ،، تابعى مع أخصائى حساسية ،، لأ ،، متديش أنتى بيوتك ..!
٣٣. مبندّيش أنتى بيوتك ولا بنعلّق محاليل
٣٤. مفاصله بتوجعه ؟؟
عملتى سرعة ترسيب ؟؟ ASOT ؟؟ عاليين ؟؟
مبروك ،، كل ده لوحده مالوش لازمه في التشخيص وللأسف كنتى بتدّى بنسلين على الفاضى !!
لازم ولا بد وحتماً يكون فيه "التهاب" مفاصل متنقل من مفصل لآخر أو القلب مصاب أو حركات لا إرادية مفاجئة أو طفح جلدي أحمر الأطراف أو عقد تحت الجلد فوق المفاصل ( نادرة جدا).. لو ولا حاجه من الّى فاتوا موجوده يبقى مش حمى روماتيزمية قولاً واحداً ..
٣٥. ابنك متأخر في القعود او المشي او الحركة بشكل عام ؟؟ ادّيتى كالسيوم وڤيتامين د بجرعات عالية ومجابش نتيجة ؟؟
خلّى بالك ممكن يكون السبب ضمور في المخ أو الأعصاب أو العضلات ،، مش كل حاجة كالسيوم
٣٦. متدّيش كالسيوم .
٣٧. متدّيش كالسيوم إلا لو في نقص موثق بالتحاليل أو تشنجات قي اليد والقدم أو اختناق أو حساسية لبن محتاجه جرعات وقائية.
٣٨. قاعدة عامة :
التغير اللى يحصل في طفلك ( قئ، إسهال، امساك،كحة، حرارة)،، طالما مش مستمر،، وميأثرش على نموّه ،، ولا وزنه ،، ولا صحته ،، ولا جسمه ،، ولا التطور العقلى ولا الحركى واللغوى ،،، يبقى متهتميش بيه ولا تسألى عنه ولا تكشفى عليه ..
بس كدة بالبساطه دى ..
٣٩. الطفل أقل من شهر ليه معاملة خاصة:
نشيله بالراحه ،، الهزّ العنيف ممنوع ،، التقبيل في الفم ممنوع.. الوضع فورا للفم في ثدى الأم بعد الولاده.،، لا مش عاوزين بيبي درينك ولا لبن صناعى ،، لبنك هينزل بإذن الله مع مص البيبي مش مع الصناعى اصبرى بس،، منستناش عليه ،، لو شِرِق على طول نقلبه على بطنه ونخبط على ظهره برفق ،، لو سِخِن نكشف فوراً ،،ڤيتامين ك بعد الولادة مياشرة وفيتامين د اول يوم ٤٠٠ وحده، كحول للسره وقطرة للعين لمدة ١٠ أيام.
٤٠ . الأم الدكتورة دايماً هادية ،، بتتعامل مع طفلها بنظافة ،بتغير الحفاضة فوراً بعد المياه أو الستول وبتدهن زيت زتون أو زنك كل تغيير، بت "فلتر" معلومات تيته- ربنا يخليهالنا- كويس أوى ،، وبتريحها وبرضه بتعمل الصح ، بتسأل كويس عن المعلومة الصح من دكتور ثقة ،، بتعرف امتى تسأل الدكتور ،، وامتا لازم تكشف وامتى تعالج هيا الطفل
د. أحمد الخطيب