كل ٍ تمنى دنيته نعمه وخير
والخير في يد خالقنا نزولـه

محد ٍ على ماوده ايصير بيصير
الي انكتب واجب علينا قبوله

الله رزقنا العقل دون ً عن الغير
امشي بعقلك تلقى الخطاوي خجوله

البعض يكبر بس بافعاله صغير !
والبعض فعله يسوى مليون دوله !!

بالطيب تلقى كل معزه وتقدير
والشهم فعله يقترن بالبطوله

ماهي الرجوله ابعقال وكنادير
فعل الشهامه اصل معنى الرجوله !

اترك حديث ٍ دون معنى وتفسير
واحسب حساب الي لسانك يقوله

لاتعاير الاجناس من دون تبرير
الكل يحمل افتخار ٍ باصوله !!

اختر رفيق ٍ صادق وصافي الضمير
لامن رآه القلب حيّا بزوله

لي يحمل الفزعه في الوقت العسير
وله في ميدان الوفا صوله وجوله

واحذر ملايين الحذر من نافخ الكير
لا يدنسك ياطاهر الاصل بسهوله

خلك بعين الناس من حولك كبير
وابقى الذي ابعزة النفس اشهدوا له

كانك فقير ٍ لاتشوف الهوامير
شف للذي ذاق العنا م الطفوله

عاش القساوه في زمن قاسي مرير
وقته شحيح ٍ والملا ماعطوا له

وكانك من الي يحملون الدنانير
ياخوي مالك جايز ٍ تفقد حصوله

اعطف على كل مسكين وفقير
خلك مطر كل ٍ تمنى هطوله

خل الكرم طبعك من دون تبذير
والصدق في كل حالاتك تقوله

تلقى الموده والمحبه من الغير
وتبقى اساس المرجله والرجوله







تحياتي