شخبط شخابيط لخبط لخابيط
مسك الالوان ورسم على الحيط
هي اغنية نانسي عجرم تقبر قلبي
انا متأكد انها لو كانت عنا في الحارة لغنتلي اياها خص نص
ما بعرف بس كانت عندي هواية الكتابة على الحيطان او اي اشي ممكن ينكتب عليه
ودايما معي قلم فولماستر وحاطه بجيبتي لزوم الشخبطة
ما تركت ولا سور فيكي يا حارة الا وطقعت عليه شخابيطي
وعلى الاغلب كانت شخابيطي انه اكتب اسمي المستعار
ايامها كان كل واحد يسمي حاله اسم حركي
ايامها ما كنت ازعر لسا
كنت مسمي حالي ابو عبده
بيجوز عشان بحب محمد عبده

المهم خليني احكيلكم على نهفتي يلي صارت بالمدرسة
كعادتي وين ما اروح ومعي قلم الفولماستر وبخربش فيه
في حمامات المدرسة على الدرج في اي مكان المهم اخربش
واهم اشي كانت الكتابة على الدرج عشان ما يتخربط وثاني يوم الاقي فلان مبدل الدرج
كان صفي ثامن وقتها
دخلت على الصف ومعي القلم وبلشت اخطط واكتب على الدرج

ابوعبده
وحبك عذاب
وحرف N على اساس انه حصتي يعني
ومش عارف شو كمان المهم كنت اخبص كثير

كل واحد في الصف صار بده يكتب على درجه
وكلها صارت تطلب القلم مني
وانا من باب المحافظة على القلم ما رضيت اعطيه لحد
وبنفس الوقت ما ما بدي افشل اي واحد فيهم
فحكتلهم يلي بدكم اياه انا بكتبه
وافق الاغلبية
وبلشت انط من درج لدرج واشخبط واكتب
خلصت تقريبا 90 بالمية من دروج الصف
اجا وقت حصة الدين وكان الاستاذ زنخ كتير وما حدا بيطيقه
الاستاذ قاعد بيكتب على اللوح
في واحد صاحبي بيعز علي كتير طلب مني القلم بده يكتب شغلة على درجه
حكتله بعد ما تخلص الحصة
حكالي لا تخاف عالسريع بكتب
اعطيته القلم
وعشانه استاذ دين شكله نزل الوحي على الاستاذ
وحكاله امشي بالصف وروح على درج صاحبي وامسكه متلبس بالجريمة
الاستاذ : بتخربش على الدرج يا كلب ( اشمط كف بنص صباح صاحبي )
هات القلم ولا والحقني على المدير
راح صاحبي مع الاستاذ ونزلو على المدير
فش 5 دقايق برجعة الاستاذ وصاحبي ومعهم المدير
صاحبي : هي يا استاذ حمزة صاحب القلم وهو يلي خربش على دروج الصف كلها
انا :
المدير متفقدا دروج الصف : ما شاء الله عنا مواهب في المدرسة ، تعال عندي هون

قمت زي الارنب ووقفت قبال المدير بس بعيد عن مرمى ايده لانه رح يشمطني الكف رح يشمطني الكف
وفعلا نزلت المزربة ايده على وجهي بس ما اجت فيي
عصب المدير وحكالي الحقني تحت