الفريك اللي ما يحبش شريك...


الفريكه من الوصفات اللي اعيز وانا اقول عنها لذيذه...وسبحان الله كل بلد له طريقه فيها وكلهم حلوين...في ناس تخلطها مع العيش المصري واللحم المفروم على الويه وفي ناس تخلط الفريكه مع الخضار مثل البزاليا والجزر اوالحمص وفي ناس تخلطه مع البرغل وتطبخه بطريقه برغل بدفين

المكسرات تعطي طعم لذييييذ حق الفريكه انصحكم ما تلغونها الا اذا ما كنتم تحبونها...ممكن تحشون الدياي بالفريكه قبل لا تدخلونه الفرن والباجي تطبخونه عادي ويكون شكله فاخر حق العزايم خاصه اذا زيتنوه بالمكسرات مع اللحم المفروم واذا تحبون انزلكم الوصفه مع الصور

الفريكه حلوه تنوكل مه روب او سلطه روب بخيار وسلطه ناعمه وتقدرون ماي سلق الدياي تضيفون له شوي طحين ومستكه وتخلونه على النار لين يثقل شوي وتقدمون بجانب الفريكه

الخطوات اللي اذكرها تنفع حتى مع اللحم بس الدياي اخف من وجهه نظر ابوي...الدياي تقدرون تشوونه باي طريقه تحبونها مو الا تلتزمون بالوصفه او تقدرون تخلونه يطبخ بنفس جدر الفريكه على هواكم



بالنهايه اقول تسلم ايد ابوي الغالي لانه اهو اللي باشر الطبخه :>...وبنهايه اليوم ما ظل منها ولا فتفوته مع اني زياده الجيله ههه





المقادير

ديايتين وزن كل وحده تقريبا كيلو مقطعه الى ارباع



علبه فريكا منظفه .. انا استخدمت هالمره ماركه كابيتلو وكانت متروسه وسخ فما انصحكم فيها لانها متعبه بالتنظيف..العلبه بعد

التنظيف عطتني 4 اكواب...وطريقه التنظيف تلقونها بوصفه الفريكه الثانيه اللي نزلتها



بصلتين كبار مقطعين ارباع لسلق الدياي



بصلتين كبار مفرومين



مكعبين ماجي



بهارات عدله تقريبيه ( 10 هيل -4 ورق غار- 3 حبات مسمار- 10 حبات فلفل اسود -3 دارسين



5 حبات مستكه



قفشه صغيره دارسين ناعم+ شوي حق تتبيل الدياي



فلفل اسود ناعم لتتبيل الدياي



بهار ناعم تقريبا نص قفشه صغيره حق الفريكه وشوي عشان تبهير الدياي



ملح



روب لتبيهير الدياي



مكسرات مقليه مثل اللوز والصنوبر والكاجو

زيت نباتي او سمنه حسب الرغبه



الطريقة

نسلق الدياي مع البهارات العدله والبصل الارباع والماجي ونتركها لين تنضج مع ازاله الزفره اذا ظهرت...وبعدين نصفي المرقه عشان نستخدمها بالفريكه ونعدل ملحها اذا نحتاج

ناخذ الدياي ونخلط الروب والدارسين والفلفل الاسود والملح والبهار ونتبل فيهم الدياي ونحمرهم بالفرن..الروب رح يعطي تحميره حلوه وتقدرون تستغنون عنه اذا ما تحبون

نحمس البصل ونضيف له الفريكه المغسوله ونحركها لين تفلفل عدل يعني حوالي 5-10 دقايق وبعدين نزيد قفشه دارسين ناعم ونص قفشه بهار ونضيف ماي السلق لين تغطي الفريكه بحوالي 3 سم

نتركها لين تغلي وتنشف تقريبا وبعدين نغطيها ونخليها على نار هاديه 30-45 دقيقه من غير ما نحركها وقبل النضوج بشوي نقلبها ونتركها 5 دقايق على النار عشان نتاكد انها مفلفله عدل

ننجب الفريكه ونصف فوقها الدياي ونزينها بالمكسرات وبالف عافيه