هلا بلش الجد.. اباجورة بالخطوات .. ومعلومات وتفاصيل مهمة جدا

[شهود]

السلام عليكم ورحمة الله وبركاته ..
الحمد لله اني لقيت متسع شوي من الوقت حتى اشرح الكو الاباجورة مع تنسيقة الشجر
..
ولاحظوا اني رح اخلي الصورة النهائية بالآخر حتى تمشوا بالمراحل معي مرحلة مرحلة
واللي بيستعجل عشان يشوف نهاية الموضوع مباشرة رح تروح منو بهجة المنظر النهائي
وعلى العموم بدي انبه على شغلة مهمة جدا
انتبهوا للشرح اهم من الصور لاني اليوم باذن الله رح احط تفاصيل مهمة وربما جديدة على البعض
وبعضها مهنية بحتة
وبالنسبة للبدائل .. كل اشي الو بديل زي ما بتعرفوا .. واحيانا من كتر ما الاخت بتفكر على بديل ممكن تطلع معها فكرة جديدة احلى واحسن واسهل من الفكرة الي كتبناها سبحن الله


والآن خلينا نبدا الشرح
خدوا نفس عميييييييييييييييييييييييييييي يق وتابعوا لو سمحتو خطوة خطوة..
القصة بدات من لما ابوي الله يطولي عمروا اجت عندهم الامانة وبلشت تخلع ببعض اشجار الزيتون الي حولين حارتهم

واجو يخلعو الزيتونة القريبة من بيتنا فابوي عزت عليه ..وقالهم اذا انكو خالعينها خالعينها جيبوها الي بس تخلعوها
وابوي قلي خدها اكيد بتستفيد منها بشغلك
قلتلوا له يا ابوي انا الي بستفيد
وهي الجذع .. والقرمية ( احنا في فلسطين هيك بنسمي الجذع الي تحت الي زي الجذر )




بدات في القرمية ونفختها بفرد الهوا كويس عشان تروح الغبرة .. ولاحظا اني ما غسلتها لانها كتير قديمة وما بديخل خلالها المي


وعشان اوصل الجذعين مع بعض دهنت سايكوت بكثرة على الجذع والقرمية .. وليش السايكوت مو الغرا؟ لاني كل شغلي الجاي على السايكوت .. والسايكوت قلتلكو لما ينشف بلصق مثل الغرا بالضبط



وبعدين جبت فرد المسامير وهذا الفرد بستخدموا النجارين والمنجدين بضرب مسامير بقوة الهواء وصرت اضرب المسامير على اسفل الجذع مع القرمية



انا اسف كتير لكن بعد ما بلشت انزل الصور اكتشفت انو في منها صور كتير مو واضحة

وهيها هلا مشدودة زي كانها الجذع جزء من القرمية

وهلا ببلش في الدهان للشجرة
انتبهوا شوي هون
عندكو عدة خيارات .. إما دهان اي لون مائي او زيتي
او تدهنوا فقط لكر وقبلوا سلر عشان تحافظ الشجرة على لونها الاصلي
وانا سويت الخيار التالي شفتوا احلى اشي
جبت سايكوت نوع تاني شفاف مكتوب على علبتو كلير (cleer ) ولونتو بلون بني ورشيت عليها .. والسبب اني بدي الشجرة تطلعلها لمعة .. وتسكر كل مساماتها تماما حتى مع الزمن ما يكت لونها او تقشر .. والسايكوت احسن اشي لهاي الشغلة
وليش مو السايكوت الابيض ؟ لاني اذا لونت الابيض بدي احط لون كتير لما يغمق وبالتالي بتروح كثافة السايكوت وبيصير كاني بس برش لون بني .. والسايكوت الشفاف بس بتحطي شوية لون بيصير نفس اللون الي بدك اياه



شوفوا الفرق بين اللونين قبل ما اخلص رش
ولاحظوا انو اللون حيغمق اكتر بس ينشف السايكوت متل الغرا كيف لما ينشف بيصير شفاف وهذا السايكوت الشفاف لما ينشف بيصير لونو بني نفس اللون الاي لونتو فيه

وهيو لما غمق اللون


وهلا رح ابلش في الشيد .. اغلب المعلومات حتكون على الشيد .. الي هو طربوش الاباجورة ما بعرف شو بتسموا انتو

هلا لا تنصدموا .. هذا شيد خربان قديم لكن احنا بدنا نشتغل عليه حتى ما نكبوا ونستفيد منوا




بلشت ارش عليه سايكوت حتى يشرب القماش السايكوت ويستوعب الالوان الي رح تنحط عليه .. وسبب آخر .. السايكوت بشد القماش .. فذا لاحظتوا في جزء من قماش الشيد ممزوع وانا ما بدي الشيد يكون مترهل فبشدوا بالسايكوت

وهلا ببلش اعطي زي تشجير للشيد بنفس الفرشاي مع سايكوت جامد مو مخفف


طيب وهلا رح اترك الشيد ينشف .. بدو ثلاث ساعات في الشوب حتى ينشف .. وفي شغل كتير كمان لكن نرجع للشغل على الجذع الي فكرتو الاخت سوالف نهار رجل انسان هههههههههههههه





شوفوا ما احلى لمعتو ولونو .. والله لهلا بدون اشي انا بشوفو هيك تحغة ..
عكل حال هلا بدي اسوي عليه تنسيقة شجرة .. والي عمرها ما نسقت شجرة تنتبه لهاي الطريقة وهي اسهل الطرق في تنسيق الشجر

لاحظوا باخد مفصل من مفاصل الجذع وبخركو بالدريل .. وشوفو للخزوق .. الي بالنص اكبر يعني خرمتو بريشة اكبر لاني بدي احط فيه وحدو 4 عروق .. والي في الجوانب كل خرم عرقين عرقين

وحتى انتهي من التخريم خالص خرمت مكان وصلة الكهرباء الي حتيجي عليها قاعدة الشيد
ولاحظوا اني خرمن من اعلى ومن جنب .. وحتعرفوا ليش لما نيجي نركب الشيد



وبلشت اخرم برضو اسفل الشجرة ..
لاحظوا كيف طريقة التخريم في الاسفل .. حولين الجذع وعلى القرمية دائرتين من التخريم .. دائة اقرب من الجذ ودائرة ابعد حتى اوزع الورق الي حنسقو على الجذع من فوق وعلى القرمية والصورة بتوضح كيف التخريم وبعدين كيف التنسيق بس تابعوا

وهلا لاحظوا كيف تثبيت الورق العروق
بعبي الخرم بالسيليكون .. وبحط الجذع مباشرة .. طبعا صعب جدا يخلع الجذع الا اذا بدك انت تخلعي غصبا لانو محشور حشر وبالمناسبة في كل خرم بحط عرقين






طبعا في التنسيق الناس اذواق .. لكن انا فقط بعطي فكرة وانتو بتبدلو وبتغيروا زي ما بدكو وانتو حتكونو مزوقات اكتر مني بهاي الشغلات لانها بدها نظرة ست البيت للون الاثاث وشكلو

وهلا ببدا بالمفصل التاني من الجذع بس جهز المفصل الاول .. ومر تاني بحكيلكو هون ذوقكم في التنسيق ولكم كل الخيار بذلك


وهلا ببدا بالي تحت .. ومر تانية شوفو الخزوق الي على القرمية .. كيف اشي منها داخل واشي خراج ولاحظوا التنسيق في الداخل كيف وفي الخراج كيف

لاحظوا الورق في الخروم الامامية عالي.. يعني برفعوا لجهة الجذع


والخروم الخارجية .. بحط عليها عروق صغيرة .. والسبب اني برضو ما بدي اخفي منظر القرمية الي تحت نهائيا لانها بحد ذاتها معطيي جمال للمنظر




وهيك النتيجة النهائية للتنسيق

طيب هلا لاحظوا الشيد نشف .. ولما نشف بين شوي الي تحتو لانو القماش شرب السايكوت مو مشكلة .. بامكاني ارش كما وجه لكن ما في داعي لاني لازم احط سايكوت في مرحلة تانية لاحقة فتابعوا هلا في تفاصيل مثيرة ومعلومات قيمة بانتظاركم في هذا الجزء من الشرح


تاملوا في هاي العلبة ...
اسمها فوم رش عازل .. صدقوني الشغل في هاي المادة كنز وحلو جدا ..
بس خليني افصللكو شوي عن هاي المادة
أولا هي موجودة اكيد في كل البلدان ما بدها بديل لانها بتلزم النجارين كتير
شو شغلها الاصلي ؟ هاي عبارن عن مادة زي البوليسترين بالضبط لكن ضغطها عالي جدا .. بتنرش رش .. وبطلع رغوة او ما ترشوها
وبيعمل فيها النحارين عازل بين الباب والحيط .. احيانا بعد ما يخلص النجار شغلوا بلاحظ انو في شقوق بين الباب والحيط .. فبعبي هاي الشقوق من فوهة هاي العبوة .. شو بصير .. او ما بتنرش بتكون لينة جدا وصغيرة الحجم وزي الرغوة - زي ما حتشوفو - بعدين بتكبر .. حتى توصل لآخر حجم الها .. وبتنشف ولما تنشف بتصير زي الفلين لكن اقوى بكتير والتصاقها عالي
بس قبل ما افرجيكو شغلها بدي احكيلكو معلومة مهمة .. للي عندهم شقوق بطلع منها صراصير اجلكم الله او نمل .. هاي بتسكر الشقوق تماما .. والزايد بتقصوا بالمشرط .. بدل ما تجيبوا جبس وتخربوا الدنيا فيه




وطبعا متوفرة بكثرة ..




هاي الخرطوم تبعها عشان يسهل استخدامها في الشقوق



بس انسيت احكيلكو آخر شغلة عنها
حاولوا جمعوا عدة اعمال لما تشتغلوا فيها لانها بتسكر بسرعة .. بالعادة النجارين بشتغلوا فيها كلها كاملة مرة وحدة وبزتوها .. وبالنسبة الي بكون مجمع عدة براويز ومناظر مع عملي وبشتغل فيها .. بتمد معاي لعمل 10 براويز تقريبا

وفي هذا العمل جبتلكو مثال كيف ممكن احطها على البرواز .. لكن البرواز لسا بدو شغل فبشرحلكو عنو بعدين

بتجيبوا مجحاف وبتصيروا تدهنوا منو على المنظر بشكل عشوائي .. وبصير ينفش الفوم شوي شوي

تابعوا الصور

وهلا برشها على البرواز لاني حستغل الاخذ من البرواز للشيد لاني ما بدي احطو على اشي تاني ويضيع .. يعني بضرب عصفورين بحجر هههههههههه




لاحظوا هاي الصورة اخدت من البرواز والبرواز هيك بيكفي .. هذا حيرجع ينفخ .. وحطيت لشيد




لاحظوا على البرواز كيف اول ما بلش ينفخ ولسا حينفخ كمان







وشوفوا كيف البرواز ؟ بلكن كملت شغلوا لاحقا وفرجيتكوا كيف بنشتغل فيه


طيب هلا على فرض انا ما بدي اعمل بالفوم الا قطعة وحدة شو اساوي ؟ ارميه ؟ بقول لاااااااااااااااااا انا ضد نرمي اي اشي الو فائدة
بنحط مباشرة قبل ما ينشف على فوهته مسماء وبنحشروا بالفوهة


وبنلف عليه لاصق ورق .. والهدف حتى ما يدخلو اي هواء والا بسكر .. ولما تيجو تشتغلوا مر تانية بتقصوا هذا الجزء الي لصقتوه قص لانو رح يكون جامد وبتكملوا عمل لكن بخرطوم اقصر



طيب هلا والسؤال ليش كل هذا التفصيل بالفوم
السبب مو هاي الاباجورة . انا بدي في هذا الموضوع اني افيدكو اكبر فائدة لمعلومات مختلفة


هلا متلا جا معلومات مهمة عن فرد جديد اسمو فرد جوما

شوفوا الشغل فيه كيف بجنننننننننننننن بس تابعوا معي اول باول

شوفوا كيف نفخ الفوم .. لكن لا ترتعبوا من المنظر زي ما ارتعبت اختنا الغالية سوالف نهار اول الموضوع




هذا فرد الجوما .. ليش هيك اسمو ؟ لانو الاصل انعمل لمادة الجوما وهي مادة حلوة لكن هلا ما بدي اشغلكو فيها .. لكن لاحظوا صورتوا .. انبوب طويل وفوهتو كبيرة مقارنة بالفرود الأخرى .. والسبب حتى لما يرش يرش كمية اكبر .. ومع ضغط الهواء .. السائل الضعيف بطير مع الهوا والثخين بنرش على المنظر فبصير الرش محبب .. حبيبات صغيرة .. هاي الحبيبات على المناظر بتعطي ملمس التشجير ..
الحلو بهذا الفرد انو المادة بامكانكو ترشوا فيها بدون اي تخفيف لانو برش كتير فما بسكر ..


لاحظوا كيف قطر فوهتو واسع



رح ارش في سايكوت شفاف .. والسبب اني بدي الونو اسود .. حتى اكسب عصافير في حجر واحد
اولا الفوم ناعم جدا بسحل منو اللون لكن اذا سايكوت ما بيسحل
وبعدين انا بدي سايكوت كلير شفاف لاني بدي الونو اسود تمهيدا لتعتيق الشيد
وبعدين بيسكر كل فراغات الشيد الي بقيت

وليش استعملنا فرد الجوما؟
حتى يرش سائل قوي مو مخفف
وحتى يعمل انسجام في الشيد..
حبيبات صغيرة بالسايكوت واخرى كبيرة بالفوم وكلها مغلفة بالسايكوت .. ان شاء الله تكون فهمتو اشي؟؟؟؟؟؟؟؟؟؟؟

هذا سايكوت شفاف لاحظوا بياضو اخف


رح الونو اسود


لاحظوا اللون هلا بيصير سكني غامق لكن لما ينشف بيصير اسود فاحم


وهلا بدي ارش في اللون بفرد الجوما


وهلا اطلعوا اسفل الشيد على اليمين وشوفو كيف حبيبات فرد الجوما اذا مبين معكو .. انا بالنسبة الي بحب ملمسها والشغل فيها جدا جدا جدا

وهلا هاي معلومة مهمة برضو
هذا لون ترابة ذهبي
اذا بتذكروا في البرواز المعتق دليتكوا على لون ترابة نحاسي وقلتلكوا بتخلطوا باللكر والتنر..
هلا هذا اللون بنخلط بالماء
يعني هاي ترابة مائية .. بتبللوا الفرشاي وبتغبروها بشوية ترابة وبتبلشوا تعتقوا .. هاي الترابة للعلم لسا اغلى من هديك الترابة الي حكيت عنها غالية اصلا .. هاي اذا بتعرفوا بحطوها على الجبصين في دوكورات الصالونات .. وبوشحوا اللون الي بدهنوا في على البروزات بلون لامع خفيف ذهبي او نحاسي او نهدي .. بتكون هاي الخامة .. طبعا منظرها بجنن
ليش حطيت منها هون ؟ لانو السايكوت بيقبل اللون المائي اسرع من الزيتي .. وفرصة اعرفكو على هاي الترابة






وبنبدا نعتق بامرار الفرشاي المبللة قليلا بالترابة الذهبية على النتوءات من الفوم والسايكوت .. طبعا امرار خفيف لانو اسمو تعتيق

هلا بلشت الطائة بالهبوط ..
بدنا نركب سلك الابجورة


وبنجيب السوكة والها برغي مجوف بمر من خلاله السلك الى السوكة





متذكرين اني لما خرمت الجذع من فوق ومن جنب عشان الدخل السلك من السوكة وبعدين من الجنب للكهرباء

وهيك بركب الشيد على الشجرة

لاحظوا شغلة مهمة جدا

لما ركبت الشيد ما اتوقعت انو يطلع صغير .. فطلع حجمو مو مناسب .. طبعا بستفيد من هذا الشيد بنفس الشجرة بس جذع اصغر .. وممكن تنسيقة ورد ناعمة ..
لكن بصراحة هذه الشجرة بدها شيد اكبر بتطلع جناااااان\






وهيك بكون انهينا الاباجورة .. طبعا ما كان هدفي المنظر النهائي بقدر ما هدفي المعلومات الي بتعطيقو آفاق لاعمال كتييييييييييييييييييرة ..

بس في الختام بدي اضحكو شوي


إجيت اضويلكو الاباجورة لانها رح تضوي الورق وتطلع بتجنن لكن المفاجأة انو الضو طلع محروق هههههههههههههههههههه
عن جد بحكي والله
بس اجيب ضو رح احطو واكبر الشيد شوي والحقوا بالموضوع مرة تانية ان شاء الله تعالى


وفي الختام آسف على اني صدعت راسكم بمعلومات كتيرة لكن اتوقع استفدتو ولو شوي
ربي يحفظكو وادعولي
حقوق هذا العمل لكل مسلم حاب يزين بيتو
والسلام عليكم ورحمة الله وبركاته

[ميرال]

ابداااااااااااااااااااااع مشكوووره شهود على الموضوع