السلته أو الحلبه كما يسموها أهل صنعاء وتتكون من ثلاث عناصر أساسية وهي..
أولا الحلبة: نقعت ملعقة حلبة بماء دافئ ووضعتها على جنب
خلطت بالخلاطة الخضرة حق الحلبة واللي هي قرن بسباس أخضر وربطة كراث وكبزرة وفصين ثوم ورشة كمون وشوية ملح وحطيتهم ع جنب.
وبعد ما تنقع الحلبة حق ساعة أو أكثر نصفيها من الماء ونخضبها باليد أو المضرب السلك الى ان تصبح بيضاء وتنفش مثل الكريمة بعدين نضيف لها الخضرة اللي خلطناها بالخلاطة ونقلبها بالملعقة فتصبح الحلبة خضراء ونخليها للاخر.
ثانيا المرقة : فوري اللحمة واعمليها مرقة بالحوائج والطماطم والبطاطس والكوسة والثوم.
ثالثا الكشنة:اعملي كشنة بصل وفص ثوم وقرن بسباس و حبة طماط صغيرة وملعقة صلصة وملح وفلفل ورشة حوائج وضيفي لها البطاطس اللي بالمرق.
الان نجي لتطبيق المكونات نجيب الحرضة أو المدر ونحطها على النار ونخليها تحمى قوي ونضيف لها اللحمة ونفتتها شوية وبعدين الكشنة ونخليها تحمى وبعدين نكسب لها المرقة ونخليها تفور قوي واذا تحبي ضيفي لها شوية رز مطبوخ وبعد ما تطفي النار اعملي لها الحلبة من فوق بدون تقليب وبالهناء والعافية.