شوربات وسلطات

[شهود]

جيبالكوا شوية شوربات وسلطات هتدعولى عليها وكمان متنسوش التقيم لاحسن ازعل منكم
نبدا ياعسلات

منقول من فتكات


سلطة البطاطس بالزبادي
المقادير:

• 2 ثمرة بطاطس مسلوقة ومقشرة
• 2 ملعقة خل
• كوب زبادي
• ملح

الطريقة:
1- تبرّد البطاطس بالماء بعد ما تتسلق، وبعد كده نقطّعها لشرائح صغيرة، ونضيف عليها الزبادي والخل والملح، وبعد كده نشيل السلطة في الثلاجة، وعند التقديم ممكن نزيّنها بالبقدونس المفروم.. وبالهنا والشفا.







شوربة بالشوفان

المقادير:

• كيس شوربة جاهزة "موجودة في السوبر ماركت"
• 3 ملاعق لبن بودرة
• 3 ملاعق شوفان
• 2 كوب ماء ساخن
• 1/4 كوب كريمة طبخ

الطريقة:
1- نضرب كل المكوّنات في الخلاط، لغاية ما نحصل على خليط متجانس، وبعد كده نصب كل المكوّنات في إناء ونحطّه على النار، مع التقليب من وقت للتاني، ونسيبها على النار لمدة 10 دقايق أو لغاية ما الشوربة تغلي.

2- بعد كده ممكن نضيف بعض قطع الفراخ المقطّعة والمسلوقة، ونصبّها في أطباق الشوربة، وممكن نقدّم معاها بعض قطع الفراخ





سلطة الحمص
المقادير:

• كوب حمص مسلوق
• 1/2 كوب طحينة
• عصير ليمونة
• كمون
• ملح
• ماء

الطريقة:
نفرم كل المكونات دي في الخلاط لغاية ما تبقى ناعمة تماماً، ومفيش فيها أي قطع صحيحة، وبعد كده نشيل طبق السلطة في الثلاجة علشان يبرد وبعد كده نقدمه، وممكن نزين الطبق عند التقديم بكمية من الحمص المسلوق وزيت الزيتون.







شوربة كريمة البروكلي
المقادير:

• 1/4 كيلو بروكلي
• ثمرة بطاطس مقشرة
• 2 كوب كريمة لباني أو قشطة
• 6 أكواب شوربة فراخ
• بصلة متوسطة مفرومة
• 1/4 كيلو كرفس مفروم
• ملح وفلفل وكمون

الطريقة:
1- نجيب البروكلي ونقطّعه لقطع صغيرة، ونقطّع البطاطس لمكعبات صغيرة ونضيفهم على الشوربة، ونضيف معاهم البصل المفروم والملح والفلفل ورشة الكمون، ونسيبهم على النار لغاية ما يغلوا، وبعد كده نقلل النار على الشوربة ونسيبهم لغاية ما يستووا.

2- بعد ما نتأكد إن البروكلي استوى، نضرب الشوربة في الخلاط لغاية ما كل مكوناتها تتجانس، ونضيف معاها كمية من الكريمة اللباني، وبعد كده نرجّع الشوربة على النار ونضيف عليها باقي كمية الكريمة اللباني والكمون.

3- بعد كده نصب الشوربة في أطباق التقديم، ونزيّنها بقطع البروكلي الأخضر.. وبالهنا والشفا







سلطة التونة بالكرفس والفجل
المقادير:

• 3 أكواب تونة مصفاة من الزيت
• 8 ثمرات فجل صغيرة مقطعة لشرائح
• 2 عود كرافس مقطعين لقطع صغيرة
• 1/4 كوب بقدونس مفروم
• 2 معلقة كبيرة عصير ليمون
• معلقة كبيرة زيت زيتون
• ملح وفلفل

الطريقة:
1- هاتي طبق غويط، واخلطي فيه التونة والفجل والبقدونس والكرافس وعصير الليمون وزيت الزيتون والملح والفلفل، وقلبيهم مع بعض كويس.

2- حطي طبق السلطة في الثلاجة، وطلعيه عند التقديم وممكن تقدمي معاها عيش محمّص.. وبالهنا والشفا.







شوربة السمك والجندوفلي
المقادير:

• 1/2 كيلو سمك فيليه مطقع لمكعبات
• 1/4 كيلو جندوفلي
• معلقة كبيرة زيت زيتون
• 2 عود كرات مقطع لشرائح صغيرة
• فصين ثوم مفرومين
• كوب بقدونس مفروم
• رأس بصلة خضراء صغيرة مقطعة لشرائح
• عصير نصف كيلو طماطم
• 3 معالق كبيرة صلصة طماطم
• 1/4 معلقة فلفل أحمر مطحون
• 1/2 كوب زيتون للتقديم
• زنجبيل
• ملح

الطريقة:
1- شوّحي الكرات والثوم والبصل الأخضر في الزيت على نار متوسطة مع التقليب لمدة 3 أو 4 دقايق لغاية ما تحسي إنهم استووا.

2- بعد كده ضيفي الطماطم وصلصلة الطماطم والفلفل الأحمر والملح والزنجبيل، وسيبيهم على النار لغاية ما يغلوا، وبعد كده وطّي النار، وسيبيهم على نار هادية لمدة 15 دقيقة.

3- بعد كده بتضيفي السمك والجندوفلي، وقلبيهم بالراحة لغاية ما تحسي إن السمك استوى والجندوفلي فتح معاكي، بعد كده ضيفي البقدونس وقلّبي الشوربة كويس على النار، وبعد
كده قدّميها مع الزيتون.. وبالهنا والشفا.





شوربة الخضار والفراخ والمشروم
المقادير:

• 1/4 كيلو صدور فراخ مسلوقة مقطعة قطع كبيرة
• 3 بصلات مقطعة قطع صغيرة جداً
• كوب لبن
• 3 أكواب شوربة فراخ
• كوب دقيق
• 1/4 كيلو مشروم مقطع شرائح
• 3 ملاعق كبيرة زبدة
• عصير ليمونة
• 1/2 حزمة بقدونس مقطعة قطعاً صغيرة
• ملح وفلفل
• 3 أكواب خضار مشكل ومقطع مكعبات صغيرة

الطريقة:
1- سيحي الزبدة على النار، وبعد كده ضيفي إليها البصل مع استمرار التقليب لغاية ما لون البصل يبقى ذهبي.

2- لما تلاقي إن لون البصلة بقى ذهبي ضيفي إليها الدقيق مع استمرار التقليب لمدة خمس دقائق أو لغاية ما الدقيق يحمرّ.

3- بعد مرور الخمس دقائق ضيفي إليه اللبن تدريجياً مع التقليب المستمر علشان الدقيق ما يكلكعش.

4- بعد كده ضيفي شوربة الفراخ مع استمرار التقليب لغاية ما تلاقي إن العجينة بقت متجانسة وسمكية ومش مكلكعة، ضيفي إليها الخضار والمشروم.

5- سيبي الخليط على النار لمدة ربع ساعة، وبعد كده ضيفي إليه عصير الليمون والبهارات والملح، وسيبيه على النار لمدة ربع ساعة كمان، أو لغاية ما تلاقي الخضار والمشروم استوى، اطفي البوتاجاز وحطي الشوربة في أطباق التقديم، وزيني الأطباق بالبقدونس.







سلطة عيش الغراب
المقادير:

• علبة عيش الغراب
• فص ثوم مفروم
• 2 ملعقة كبيرة عصير ليمون
• ملعقة صغيرة زعتر مجفف ومطحون
• 1/2 ملعقة كبيرة زبدة
• ملعقة كبيرة زيت زيتون
• 2 ملعقة كبيرة بقدونس مفروم ناعم
• ملح

الطريقة:
1- اغسلي عيش الغراب كويس، وبعد كده قطعيه إلى قطع صغيرة.

2- ذوبي الزبدة في طاسة على نار هادية، وبعد كده ضيفي إليها عيش الغراب وقلبيه لمدة دقيقة، وبعد كده ضيفي الثوم وقلبيهم مع بعض لمده 5 دقائق أو لغاية ما تلاقي إن عيش الغراب استوى.

3- حطي عيش الغراب في طبق التقديم، وضيفي إليه الملح وعصير الليمون، وزيت الزيتون والبقدونس والزعتر المطحون، وقلبيهم مع بعض.






سلطة بقدونس
المقادير:

• 2 حزمة بقدونس
• عصير ليمونة
• 3 فصوص ثوم مفرومين
• ملعقة كبيرة طحينة
• ملح وفلفل
• شرائح ليمون
• أوارق بقدونس
• ثمرة طماطم مقطعة شرائح

الطريقة:
1- هاتي البقدونس، واغسليه، وقطعيه قطعاً صغيرة جداً.

2- اخلطي الثوم مع الملح والفلفل، وضيفيهم للطحينة وقلبيهم مع بعض كويس، وضيفيهم للبقدونس، وقلبيهم مع بعض، وحطيهم في طبق السلطة.







شوربة المأكولات البحرية بالليمون
المقادير:

• 1/4 كيلو سمك فيليه مقطعاً قطعاً صغيرة
• 1/4 كيلو جمبري
• 1/4 كيلو سبيط "اختياري"
• كُرات
• كرفس
• بصـل
• ثـوم
• عصير ليمون
• ملح وفلفل أسود
• قرنفل
• حبهان

الطريقة:
1- نظفي السمك والجمبري والسبيط واغسليهم كويس، وبعد كده اسلقيهم في حلة عميقة مع الكرات والكرفس والبصل المقطع والحبهان والقرنفل.

2- خدي بالك وأنتِ بتسلقي السمك إنك تشيلي الريم أول بأول، بعد كده ضيفي الملح والفلفل الأسود والثوم المفروم والبقدونس، وخليه يغلي على نار هادئة لمدة نصف ساعة.

3- بعد كده صبي الشوربة في أطباق الشوربة، وللتجميل ممكن إنك تضيفي البقدونس المفروم وترشي عليـها عصير ليمون.










شوربة الجبنة الشيدر
المقادير:

• 1/2 كيلو جبنة شيدر مبشورة
• 3 ملاعق كبيرة زبدة
• 3 ملاعق كبيرة دقيق
• ملح وفلفل وبهارات
• 3 أكواب لبن
• ثمرة بصل مقطعة قطع صغيرة جداً
• 3 أكواب شوربة فراخ أو لحمة

الطريقة:
1- ذوّبي الزبدة في إناء على النار، وضيفي إليها البصل وقلبيه كويس لمدة 5 دقائق أو لغاية ما تلاقي إن البصل لونه بقى ذهبي.

2- لما تلاقي إن البصل لونه بقى ذهبي ضيفي إليه الدقيق مع التقليب المستمر لغاية ما الدقيق لونه يبقى ذهبي، بعد كده ضيفي الشوربة واللبن بالتدريج مع استمرار التقليب علشان الدقيق ما يكلكعش منك، وسيبيهم على النار لمدة 5 دقائق أو لغاية ما يغلوا.

3- اطفي البوتاجاز وسيبي الخليط علشان يبرد، بعد كده اضربيه في الخلاط كويس، بعد كده حطيه في حلة ورجعيه على النار مرة أخرى وضيفي إليه الجبنة مع استمرار التقليب لمدة 5 دقائق علشان الجبنة تذوب مع إضافة الملح والفلفل والبهارات.







السلطة البلدي
المقادير:

• بصلة مقطعة قطعاً صغيرة
• ثمرة فلفل أخضر حار مقطع قطعاً صغيرة
• فص ثوم مفروم
• ملعقة صغيرة خل
• 2 ملعقة صغيرة عصير ليمون
• حزمة بقدونس مقطعة قطعاً صغيرة
• 2 ثمرة طماطم مقطعة مكعبات صغيرة
• 2 ملعقة كبيرة زيت ذرة
• حزمة جرجير مقطعة قطع صغيرة
• 2 ثمرة خيار مقطع مكعبات صغيرة
• ملح وفلفل
• خس مقطع قطع صغيرة

الطريقة:
دي ما فيش أبسط منها كل اللي هتعمليه إنك هتخلطي كل المقادير مع بعضها، وتحطيهم في طبق السلطة.






شوربة اللحمة بالبروكلي والفاصوليا الخضراء
المقادير:

• 1/4 كيلو لحمة مقطعة قطعا صغيرة
• بصلة متوسطة مقطعة قطعا صغيرة
• 1/2 كوب كرفس مقطع قطعا صغيرة
• 1/2 كوب بروكلي مقطع قطعا صغيرة
• 1/2 كوب فاصوليا خضراء
• 1/2 جزرة مقطعة قطعا صغيرة
• ملعقة كزبرة خضراء
• ملعقة ملح
• رشة بهارات
• ملعقة زبد
• كوب مية

الطريقة:
1- سخني الزيدة وشوّحي فيها اللحمة لغاية ما تحمر وبعد كده ضيفي إليها الملح والبهارات والبصل وقلبيهم مع بعض، وبعد كده ضيفي إليهم الخضار والجزر والفاصوليا والبروكلي والكرفس وقلبيهم مع بعض لمدة خمس دقائق.

2- بعد مرور الخمس دقائق ضيفي إليهم المية، وسيبيهم على النار لمدة نصف ساعة أو لغاية ما تلاقي أن الخضار واللحمة استوت بعد كده حطي الشوربة في أطباق الشوربة وضيفي إليها الكزبرة الخضراء.








السلطة اليونانية
المقادير:

• 4 ثمرات طماطم
• 2 ثمرة خيار
• ثمرة فلفل أخضر
• بصلة متوسطة
• 1/2 علبة جبنة ثلاجة
• 1/2 ربطة خس
• 2/1 كوب زيتون أسود منزوع البذر
• 2 ملعقة كبيرة زيت زيتون
• عصير ليمونة
• ملح وفلفل

الطريقة:
1- قطعي الطماطم إلى قطع طولية وقطعي الخيار والبصل والخس إلى شرائح وقطعي الفلفل الأخضر إلى مربعات وقطعي الجبنة إلى مكعبات صغيرة.

2- حطي الخيار والطماطم والبصل والفلفل الأخضر في طبق السلطة وضيفي إليهم الملح والفلفل وعصير الليمون ومعلقة زيت الزيتون وقلبيهم مع بعض.

3- بعد كده ضيفي إليهم الجبنة والزيتون الأسود ومن فوقهم ملعقة زيت زيتون.








سلطة الجزر والفجل
المقادير:

• 1/2 حزمة بقدونس مقطع قطعاً صغيرة
• 1 كوب جبنة بيضاء مقطعة مكعبات
• 4 فجلات كبيرة
• 3 جزرات متوسطة
• عصير ليمونة
• ملعقة صغيرة ملح
• 1/2 كوب زيتون أسود
• فصين ثوم مفرومين
• 1/4 كوب زيت زيتون

الطريقة:
1- اغسلي الجزر والفجل كويس، وبعد كده ابشريهم.

2- دقي الثوم مع الملح، وضيفي إليهم عصير الليمون والزيت، وقلبيهم مع بعض كويس، وبعد كده ضيفيهم إلى الجزر والفجل، وقلبيهم مع بعض كويس، وبعد كده ضيفي إليهم الجبنة والبقدونس والزيتون الأسود.







شوربة البنجر
المقادير:

• 5 ثمرات بنجر
• 5 ثمرات بطاطس مقطعة مكعبات
• 2 ثمرة جزر مقطعة مكعبات
• مكعب مرقة دجاج
• 3 فصوص حبهان
• 1/2 كوب كريمة لباني
• ورق لاورا
• ملح وفلفل

الطريقة:
1- اسلقي البنجر كويس أوي لمدة ساعتين في إناء عميق، بعد كده اطفي البوتاجاز وسيبي البنجر لغاية ما يبرد وقشريه وقطعيه مكعبات صغيرة.

2- اسلقي الجزر مع البطاطس، وضيفي إليهم أثناء السلق مكعب مرقة دجاج وورق اللاورا والحبهان والملح والفلفل.

3- لما تلاقي إن الجزر والبطاطس بدأت تستوي ضيفي إليهم البنجر والكريمة اللباني وسيبيهم مع بعض على النار لمدة 5 دقائق مع التقليب المستمر، بعد كده اضربي الشوربة في الخلاط لغاية ما كل المكونات تتجانس، وبعد كده رجعيها مرة تانية على النار وسيبيها لمدة خمس دقايق، وبعد كده حطي الشوربة في أطباق الشوربة.









سلطة الجرجير والبصل
المقادير:

• 2 حزمة جرجير
• عصير ليمونة
• 3 ملاعق كبيرة خل
• 2 ملعقة كبيرة زيت زيتون
• ثمرة بصل مقطعة قطعاً صغيرة
• ملح وفلفل
• 2 ثمرة جرز مبشورة

الطريقة:
1- اغسلي الجرجير كويس، وقطعيه إلى شرائح رفيعة.

2- اخلطي كل المكونات مع بعضها البعض وقلبيهم كويس وحطيهم في طبق السلطة.

• 
• شوربة الكرفس
  المقادير:
• حزمة كرفس مقطّعة قطعاً صغيرة
• 4 ثمرات بصل أخضر مقطّع قطعاً صغيرة
• 3 ثمرات طماطم مقطّعة قطعاً صغيرة
• فلفل اخضر مقطّع قطعاً صغيرة
• بصلة مقطّعة قطعاً صغيرة
• كيس شوربة بصل "من السوبر ماركت"
• ملح وفلفل
• أوراق خس "للتزيين"
• 
  الطريقة:
  1- اخلطي جميع المقادير مع بعضها ماعدا أوراق الخس، واسلقيهم على النار لغاية ما يستووا، وبعد كده اطفي النار، وسيبي الشوربة لغاية ما تبرد، وبعد كده اضربيها في الخلاط.
  
  2- بعد كده رجعي الشوربة تاني على النار وسيبيها تسخن، وبعد كده حطيها في أطباق الشوربة وزيني الطبق بأوراق الخس.
• 
• سلطة الطحينة بالخضراوات
  المقادير:
• 1/2 كوب طحينة
• 3 ثمرات طماطم مقطّعة قطع صغيرة
• فلفل رومي ألوان
• 1/2 كوب مية
• 3 معالق خل
• معلقة صغيرة ملح
• معلقة صغيرة كمون
• عصير ليمونة
• 3 فصوص ثوم مفرومة ناعم
• بقدونس مفروم "للتزيين"
• 
  الطريقة:
  1- دوّبي الطحينة في المية وضيفي إليها الليمون والخل والثوم المفروم وقلّبيهم مع بعض.
  
  2- قطّعي الطماطم والفلفل الرومي لمكعبات صغيرة وضيفيهم للطحينة، وبعد كده ضيفي إليها الملح والكمون وقلبيهم مع بعض.. وبالهنا والشفا.
• 
• شوربة الكوسة
  المقادير:
• 1/2 كيلو كوسة مبشورة
• 3 ثمرات جزر مبشورين
• فلفل أحمر مقطع شرائح طولية
• كوب شوربة فراخ أو لحمة
• بصلة مبشورة
• 1/2 حزمة كزبرة خضراء مفرومة
• ملعقة كبيرة زيت ذرة
• ملح وفلفل
• 
  الطريقة:
  1- حمري البصل في الزيت لغاية ما لونه يبقى ذهبي، وبعد كده ضيفي إليه الشوربة لغاية ما تغلي.
  
  2- بعد ما تغلي ضيفي إليها الجزر والكوسة والفلفل وسيبيهم مع بعض لمدة 20 دقيقة أو لغاية ما تلاقي إن الخضار استوى.
  
  3- بعد كده ضيفي عليهم الكزبرة الخضراء والملح والفلفل، وسيبيهم على النار لمدة عشر دقائق، وبعد كده اطفي البوتاجاز وحطي الشوربة في أطباق الشوربة.. وبالهنا والشفا.
• 
• باذنجان مخلل
  المقادير:
• كيلو باذنجان أسود طويل
• 1/2 رأس ثوم مدقوق
• 2 ثمرة فلفل أخضر مقطع قطعاً صغيرة
• 2 ثمرة فلفل أخضر حار مقطع قطعاً صغيرة
• ملعقة كبيرة ملح
• 3 أكواب مية
• عصير ليمونة
• كوب خل
• 
  الطريقة:
  1- هاتي الباذنجان واغسليه كويس واقسميه إلى جزأين، واسلقيه في مية مضاف إليها الملح لمدة ربع ساعة أو لغاية ما تلاقي إن الباذنجان بقى طري.
  
  2- طلّعي الباذنجان من المية، وحطيه في مصفاة علشان يبرد.
  
  3- افرمي الثوم والفلفل الأخضر والفلفل الحار والبقدونس في الكبة كويس، وبعد كده احشي بيهم قلب الباذنجان وبعد كده رشي عليه عصير الليمون.
• 
• شوربة القرنبيط بالكريمة
  المقادير:
• قرنبيط مقطع لقطع صغيرة
• 2 بصل أخضر مقطع حلقات
• 3 أكواب شوربة فراخ أو لحمة
• كوب زبادي
• 4 ملاعق كبيرة كريمة لباني أو قشطة
• ملعقة كبيرة زيت ذرة
• ملح وفلفل وكمون
• بقدونس "للتزيين"
• 
  الطريقة:
  1- حمري البصل فى الزيت لغاية ما لونه يبقى ذهبي، وبعد كده ضيفي إليه القرنبيط وشوّحيه معاه على النار لمدة خمس دقائق.
  
  2- بعد مرور الخمس دقائق ضيفي إليه الشوربة والملح والفلفل والكمون، وسيبيه على نار هادية لمدة ربع ساعة لغاية ما القرنبيط يستوي بعد ما تلاقي إن القرنبيط استوى اطفي البوتاجاز، وسيبيه علشان يبرد.
  
  3- بعد ما يبرد اضربيه في الخلاط لغاية ما ينعم، وبعد كده ضيفي إليه الكريمة والزبادي، واضربيهم مع بعض مرة كمان.
  
  4- بعد كده حطي الشوربة في حلة وحطيها علي النار لغاية ما تغلي، وضيفي إليها الملح والفلفل وشوية مية لو كانت الشوربة سميكة، وبعد كده حطيها في طبق الشوربة.
• 
• سلطة الكرنب والجزر
  المقادير:
• قلب كرنبة مسلوق ومقطع إلى قطع صغيرة
• جزرة كبيرة مبشورة
• بصلة صغيرة مبشورة
• 2 ملعقة كبيرة عصير ليمون
• ملعقة صغيرة خل
• ملعقة صغيرة سكر
• ملح وفلفل أسود
• 1/2 كوب زيت ذرة
• 
  الطريقة:
  1- اخلطي زيت الذرة مع عصير الليمون والخل والسكر والملح والفلفل.
  
  2- اخلطي الكرنب مع البصل والجزر وضيفي إليهم الخليط السابق وقلبيهم مع بعض كويس وحطيهم في طبق السلطة.
• 
• شوربة الخضار المشوي
  المقادير:
• 1/4 كوب زيت
• ثمرة كوسة صغيرة مقشرة ومقطعة حلقات
• 3 جزرات مقطعة حلقات كبيرة
• ثمرة فجل أبيض مقطع مكعبات
• حزمة كرات مقطعة قطعاً كبيرة
• بصلة مقطعة أربع قطع
• معلقة ورق لاورا
• معلقة زعتر
• معلقة روزماري
• 5 أكواب شوربة لحمة أو فراخ
• ملح وفلفل
• جبنة مبشورة "للتزيين"
• 
  الطريقة:
  1- شغلي الفرن على درجة حرارة متوسطة.
  
  2- اخلطي الزيت مع الخضراوات، ورشي عليهم الأعشاب اللي عندك، بعد كده رصي الخضراوات في صاج ودخليها الفرن لمدة ساعة إلا ربع أو لغاية ما تلاقيها استوت بس خدي بالك إنك تقلبيها من وقت للتاني.
  
  3- بعد ما تلاقي إن الخضار استوى طلعيه من الفرن وحطيه في حلة فيها الشوربة على النار، وسيبهم مع بعض لمدة ربع ساعة مع مراعاة التقليب من وقت للتاني.
  
  4- بعد مرور الربع ساعة اطفي البوتاجاز وصبي الشوربة في طبق التقديم.. وبالهنا والشفا.
• 
• سلطة بابا غنوج
  أكيد طبعاً كلنا بنحب سلطة البابا غنوج؛ لأن طمعها لذيذ جداً، وعلى فكرة سلطة البابا غنوج دي مفيدة جداً لأنها بتمد الجسم بكمية هائلة من الفيتامينات.
• 
  المقادير:
• حبة باذنجان رومي متوسطة الحجم
• 3 معالق كبيرة طحينة
• 3 معالق كبيرة زبادي
• 3 معالق كبيرة عصير ليمون
• 2/1 1 معلقة صغيرة ثوم مدقوق
• 3 معالق كبيرة زيت زيتون أو ذرة
• ملح وفلفل
• 
  الطريقة:
  1- اشوي الباذنجان على صاج فوق نار متوسطة، وخدي بالك إنك تقلبي الباذنجان على الوجهين، وبعد ما تلاقي الباذنجان اتشوى شيليه من على النار وسيبيه لغاية ما يبرد، وبعد كده قشّريه.
  
  2- هاتي طبق واهرسي فيه الباذنجان بالشوكة. وبعد كده ضيفي إليه الطحينة والزبادي والثوم المدقوق واخلطيهم مع بعض كويس، وبعد كده ضيفي الملح والفلفل وعصير الليمون وقلبيهم تاني مع بعض.
  
  3- بعد كده ضيفي على وش الباذنجان الزيت، ولتجميل الطبق ممكن تحطي أوراق بقدونس وقطع من الزيتون الأسود.
• 
• سلطة الطحينة بالزبادي
  المقادير:
• 1/2 علبة زبادي
• 4 معالق طحينة
• نص حزمة بقدونس مقطعة قطعاً صغيرة
• 3 فصوص ثوم مفروم
• ملح وفلفل وبهارات
• 3 معالق مية سخنة
• 
  الطريقة:
  هاتي طبق السلطة وحطي فيه الطحينة وبعد كده ضيفي إليه المية والزبادي وقلبيهم بالمعلقة كويس، وبعد كده ضيفي إليهم الثوم والملح والفلفل والبهارات والبقدونس واستمري في التقليب لغاية ما تلاقي إن الطحينة بقت سايلة.
• 
• شوربة لسان العصفور بالجمبري
  المقادير:
• 1/2 كيلو لسان عصفور
• 1/2 كوب زيت ذرة
• بصلة مقطعة قطعا صغيرة جدا
• 3 فصوص ثوم مفروم
• 1/4 كيلو جمبري صغير مقشر
• 2 كوب مية
• 2 ورقة لاورا
• عصير أربع ليمونات
• 6 أعواد كرفس مقطع قطعا صغيرة
• بهارات سمك
• ملح وفلفل وكمون
• قرن فلفل أحمر مقطع قطعا صغيرة
• 
  الطريقة:
  1- هاتي الثوم والفلفل الأحمر وحطيهم في الهون ومعاهم الملح والكمون والبهارات واطحنيهم كويس مع بعض، وبعد كده ضيفي إليهم الليمون وقلبيهم مع بعض.
  
  2- هاتي الجمبري واغسليه كويس وبعد كده رشي عليه الخليط السابق وسيبيه لمدة نص ساعة علشان يتبّل كويس.
  
  3- شوّحي لسان العصفور في الزيت لغاية ما لونه يبقى ذهبي، وبعد كده اطفي البوتاجاز.
  
  4- حمّري البصلة والثوم فى الزيت، وبعد كده ضيفى إليهم الجمبري والمية المذاب فيها بهارات السمك.
  
  5- اتركي الخليط في الحلة على النار مع إضافة ورق اللاورا وأعواد الكرفس وعصير الليمون لمدة ربع ساعة وبعد كده اطفي البوتاجاز.. وبالهنا والشفا
• 
• شوربة اللحمة المفرومة مع الشعيرية
  المقادير:
• كيس شعيرية سريعة التحضير
• 1/4 كيلو لحمة مفرومة
• 6 كوبايات شوربة فراخ او لحمة
• بصلة مفرومة
• ملح وفلفل
• 
  الطريقة:
  1- اخلطي اللحمة المفرومة مع البصل والملح والفلفل وقلبيهم كلهم مع بعض كويس علشان اللحمة تتبل.
  
  2- شكّلي اللحمة على شكل كرات صغيرة ورصيها في صينية، وبعد كده دخليها التلاجة لمدة نص ساعة.
  
  3- هاتي حلة وحطي فيها الشوربة وسيبها لغاية ما تغلي، وبعد كده ضيفي إليها الملح والفلفل، وسيبيها على النار لمدة عشرة دقائق، بعد كده ضيفي إليها كرات اللحمة وسيبيهم على النار لمدة نص ساعة لغاية ما اللحمة تستوي، وقبل أذان المغرب بنص ساعة حطيها على النار للتسخين وعند الغليان ضيفي عليها عبوة الشعيرية سريعة التحضير وسيبيها تغلي لمدة 5 دقائق بس، واطفي عليها وسيبي الحلة مقفولة لمدة 5 دقايق كمان وبعدين اغرفي الشوربة في أطباق التقديم.. وبالهنا والشفا.
• 
• سلطة البصل بالجزر
  المقادير:
• 3 بصلات متوسطة الحجم
• 3 جزرات متوسطة الحجم
• عصير ليمونة
• ملح وفلفل
• 
  الطريقة:
  قطعي البصل والجزر شرائح طولية رفيعة وضيفي إليهم الليمون والملح والفلفل وقلّبيهم مع بعض كويس.
• 
• سلطة الطحينة الحارة
  المقادير:
• كوب طحينة
• 4 فصوص ثوم
• 1/2 كوب لبن
• عصير ليمونة
• قرن فلفل أحمر حار
• 2 معلقة كبيرة زيت ذرة
• ملح وفلفل
• 1/2 فنجان مية دافية
• 1/2 معلقة كمون مطحون
• أوراق بقدونس "للتزيين"
• حمص "للتزيين"
• 
  الطريقة:
  1- اطحني الثوم مع الفلفل الأحمر، ومعاهم الملح والفلفل كويس لغاية ما تلاقيهم بقوا ناعمين قوي، بعد كده هاتي طبق السلطة، وحطي فيه الطحينة، وضيفي عليها باقي المكونات دي ما عدا الزيت وابدئي في خلطهم كلهم مع بعض كويس.
  
  2- بعد ما تتأكدي إن الخليط بقى ناعم، ضيفي الزيت والكمون المطحون وأوراق البقدونس والحمص للتزيين
• 
• شوربة الخضار والفراخ والمشروم
  المقادير:
• 1/4 كيلو صدور فراخ مقطعة قطع كبيرة ومسلوقة
• 3 بصلات مقطعة قطع صغيرة جداً
• كوب لبن
• 3 أكواب شوربة فراخ
• كوب دقيق
• 1/4 كيلو مشروم مقطع شرائح
• 3 معالق كبيرة زبدة
• عصير ليمونة
• 1/2 حزمة بقدونس مقطعة قطعاً صغيرة
• ملح وفلفل
• 3 أكواب خضار مشكل ومقطع مكعبات صغيرة (جزر - بسلة - بطاطس)
• 
  الطريقة:
  1- سيّحي الزبدة على النار، وبعد كده ضيفي إليها البصل مع استمرار التقليب لغاية ما لون البصل يبقى ذهبي.
  
  2- لما تلاقي إن لون البصلة بقى ذهبي ضيفي إليها الدقيق، مع استمرار التقليب لمدة خمس دقائق أو لغاية ما الدقيق يحمرّ.
  
  3- بعد مرور الخمس دقائق ضيفي إليه اللبن تدريجياً مع التقليب المستمر علشان الدقيق ما يكلكعش.
  
  4- بعد كده ضيفي شوربة الفراخ مع استمرار التقليب لغاية ما تلاقي إن العجينة بقت متجانسة وسميكة ومش مكلكعة ضيفي إليها الخضار والمشروم.
  
  5- سيبي الخليط علي النار لمدة ربع ساعة، وبعد كده ضيفي إليه عصير الليمون والبهارات والملح وسيبه على النار لمدة ربع ساعة كمان، وبعد كده اطفي البوتجاز وحطي الشوربة في أطباق التقديم وزيني الأطباق بالبقدونس.

منقوووووووووو

سلطة الفلفل المشوي

المقادير:
ثمرة فلفل أحمر متوسطة الحجم
ثمرة فلفل أخضر متوسطة الحجم
1/4 معلقة صغيرة فلفل أسود
ثمرة فلفل أصفر متوسطة الحجم
نص حزمة بقدونس "للتزيين"
4 فصوص ثوم مفرومين

الطريقة:
1- هاتي الفلفل واغسليه كويس، وبعد كده نشّفيه واشويه على نار متوسطة الحرارة مع تقليبه من جميع الجوانب.

2- بعد ما يتشوي الفلفل سيبيه لغاية ما يبرد، وبعد كده قشريه، وشيلي البذر منه، وبعد كده قطعيه إلى قطع صغيرة.

3- هاتي طبق السلطة وحطي فيه الفلفل المقطع وتبليه بالملح والفلفل الأسود والثوم، وممكن إنك تزيني الطبق بالبقدونس.







شوربة الجزر
النهارده هنستفيد من الجزر في عمل طبق شوربة في منتهى الجمال ودي الطريقة...

المقادير:
1/2 كيلو جزر
2 حبة بطاطس كبيرة
معلقة كبيرة بقدونس مفروم
معلقة كبيرة زبد
شوربة فراخ أو لحمة أو مرقة دجاج + كوب مية
بصلة مقطعة قطعاً صغيرة

الطريقة:
1- هاتي الجزر والبطاطس واغسيلهم كويس وقشريهم، وبعد كده قطعيهم إلى قطع صغيرة.

2- هاتي حلة وحطي فيها الزبدة، وحمّري فيه البصل والجزر والبطاطس على نار منخفضة لمدة 15 دقيقة مع التقليب المستمرّ.

3- بعد مرور الربع ساعة ضيفي إليهم الشوربة والملح والفلفل، وسيبيهم لغاية ما يغلوا وتلاقي الجزر والبطاطس بقت لينة. بعد كده اطفي البوتجاز، وسييبها لغاية ما تبرد، وبعد كده اضربيهم مع بعض في الخلاط.

4- بعد ما تضربيهم في الخلاط هاتي الحلة وحطيهم على النار، وسخنيهم مرة كمان، وبعد كده صبيهم في أطباق الشوربة، وزيني الطبق بالبقدونس المفروم، وعلى فكرة ممكن لو لاقتي قوام الشوربة سميك ممكن إنك تضيفي المية السخنة أثناء الغليان في المرة الثانية.







سلطة الفتوش

المقادير:
1/2 رغيف محمص
3 حبات طماطم
3 حبات خيارات
3 حبات فجل
4 أعواد بصل أخضر "الجزء الأبيض"
بصلة
حبة فلفل أخصر
خس
حزمة بقدونس مفرومة
1/2 كوب عصير ليمون
2 فص ثوم مفرومين كويس
1/2 معلقة صغيرة نعناع ناشف مفروك
1/2 كوب زيت زيتون
1/2 معلقة صغيرة سماق مطحون (موجودة عند العطار)
1/2 معلقة صغيرة فلفل أحمر مطحون (موجود عند العطار)
ملح
1/2 رغيف للتزيين (حسب الرغبة)

الطريقة:
1- كسّري الرغيف المحمص لقطع صغيرة.

2- اغسلي الخضار كويس جداً، وقطّعيه كله لقطع صغيرة أوي وتكون كلها متساوية في الحجم.

3- أحضري وعاء كبيراً، وحطّي فيه الثوم والملح والزيت والخل والنعناع الناشف وعصير الليمون والسماق وحطيهم على جنب.

4- بعد كده اخلطي الخضار المقطّع في وعاء تاني، وضيفي عليه الخبز المحمّص وخليط الثوم والملح والزيت اللي حضّرتيه في الأول، وقلّبي كل المكوّنات مع بعضها، وممكن تزيّنيها بإضافة قطع الخبز المحمص على الوش.. وقدّميها وبالهنا والشفا






شوربة العدس على الطريقة السورية

المقادير:
كوب عدس أصفر مسلوق
كوب قمح مسلوق
جزرتين مقطعتين لقطع صغيرة
كرفس مفروم
ملح وقرفة وكمون
ثوم مفروم
عصير ليمون
نعناع أخضر مفروم
1/4 كوب زيت زيتون

الطريقة:
1- شوّحي البصل والثوم في زيت الزيتون لغاية ما تحسي إن لونهم بدأ يتغيّر.

2- بعد كده ضيفي العدس والكرفس والنعناع والجزر، وقلّبيهم مع بعض وضيفي عليهم الملح والقرفة، وحطي عليهم كمية من الماء، وسيبيهم على نار هادية لمدة 40 دقيقة أو لغاية ما تحسي إن كل المكوّنات اتسلقت كويس.

3- اضربي الخليط السابق في الخلاط كويس وصفّيه، وبعد كده خدي الخليط المصفّى وحطيه مرة تانية على النار، مع إضافة القمح المسلوق وسيبيهم على النار لمدة 5 دقائق، وبعد كده حطي عصير الليمون والكمون، واغرفي الشوربة في أطباق التقديم، وممكن تزيّني الأطباق بأوراق النعناع وقدّميها وهي سخنة.. وبالهنا والشفا.






سلطة البيض بالبطاطس
دي سلطة مفيدة جداً، وتعتبر وجبة متكاملة؛ لأنها فيها بروتينات وخضروات ونشويات وأملاح وألياف، وممكن نعملها في أي وقت وناكلها كوجبة لوحدها..

المقادير:
6 بيضات مسلوقين
2 ثمرة بطاطس مسلوقة
ثمرة فلفل أخضر أو ألوان مقطعة شرائح
ثمرة بصل مقطعة شرائح
ثمرة طماطم مقطعة شرائح
2 معلقة كبيرة عصير ليمون
بقدونس مفروم
ملح وفلفل أسود

الطريقة:
1- قطّعي كل بيضة نصفين، وخدي الصفار واهرسيه كويس مع البطاطس المسلوقة.

2- اخلطي الملح والفلفل مع عصير الليمون والبقدونس المفروم، علشان تعملي التتبيلة بتاعة السلطة، وبعد كده حطي التتبيلة دي مع بياض البيض واخلطيهم مع بعض، وسيبي البيض شوية علشان يشرب من التتبيلة.

3- بعد كده حطي بياض البيض المتبّل مع خليط صفار البيض والبطاطس المهروسة في طبق التقديم، وزينيه بشرائح الفلفل والطماطم والبقدونس والبصل، وقدّميه وبالهنا والشفا.







شوربة ثوبا "Thupa"

المقادير:
كوب صلصة طماطم
معلقة كبيرة زنجبيل مطحون
معلقة كبيرة ثوم مفروم
كوب مكرونة أو شعيرية مسلوقة
ملح وفلفل
معلقة كبيرة سكر
4 معالق كبيرة فريش كريم
3 كوب ماء

الطريقة:
1- اخلطي صلصة الطماطم مع الثوم والزنجبيل والملح والسكر والفلفل الأسود والماء، وحطيهم على النار وسيبيهم لغاية ما يغلوا.

2- أول ما الشوربة تبدأ في الغليان، ضيفي المكرونة المسلوقة والكريمة، وسيبيهم يغلوا كلهم مع بعض من دقيقتين لثلاث دقائق، وممكن تضيفي كمية صغيرة من خليط الخل والصويا صوص علشان تديها طعم لاذع شوية، وبعد كده قدميها وبالهنا والشفا.








شوربة خضار على الطريقة الإيطالية

المقادير
2 كوب كرفس مقطع قطع صغيرة
1/4 كوب كرات مقطع لقطع صغيرة
1/2 كوب جزر مقطع قطع صغيرة
1/2 كوب كرنب مقطع قطع صغيرة
1/2 كوب بطاطس مقشرة ومقطعة لمكعبات
4 ثمرات طماطم ومقطعة مكعبات صغيرة
1/2 كوب كوسة مقطعة لمكعبات صغيرة
كوب فاصوليا بيضاء مسلوقة
1/2 كوب بصل مفروم
6 فصوص ثوم مفروم
2 معلقة كبيرة بقدونس مفروم
2 معلقة كبيرة زيت زيتون
8 أكواب شوربة لحمة
ملح وفلفل

الطريقة
1- ضعي زيت الزيتون في وعاء على نار متوسطة، وضيفي عليه البصل والكرفس والكرات والجزر والثوم والكرنب والبطاطس والطماطم، وقلبيهم كلهم مع بعض كويس جداً، بس خلي بالك إنك تحطي البطاطس في الأول؛ لأنها بتحتاج لوقت أطول شوية في السوى عن باقي الخضار، وبعد كده حطي باقي الخضار تدريجياً.

2- أول لما تحسي إن الخضار ابتدى يذبل، ضيفي الكوسة والفاصوليا المسلوقة، وبعد كده ضيفي الشوربة، وسيبيهم على النار لغاية ما الشوربة تغلي.

3- بعد كده تبّلي الشوربة بالملح والفلفل، وقدميها ساخنة وممكن كمان تضيفي لها شعيرية بحيث تبقى وجبة متكاملة فيها كل العناصر، وعند التقديم ممكن تزينيها بوضع أي نوع من الأعشاب على الوش زي الريحان أو الزعتر أو النعناع.. وبالهنا والشفا.










سلطة الرنجة
المقادير
1/2 كيلو رنجة
2 حبة بطاطس مسلوقة
ثمرة جزر
بصلة مقطعة
بصل أخضر
مايونيز
زيت زيتون
خل
ليمون
بقدونس مفروم

طريقة التحضير
1- هاتي الرنجة واشويها على النار، وبعد كده شيلي منها الجلد والشوك، وقطّعيها لقطع صغيرة، واعصري عليها الليمون.

2- هاتي البطاطس المسلوقة وقطّعيها لمكعبات، وقطعي البصل والجزر والبصل الأخضر لشرائح رفيعة.

3- ضعي الخضار المقطع وباقي المكونات فوق الرنجة وقلّبيهم كويس مع بعض، وحطّيهم في الثلاجة، وعند التقديم حطّيها في أطباق التقديم وزينيها بالبقدونس.. وبالهنا والشفا.










شوربة لسان العصفور باللحمة المفرومة

المقادير
1/2 كيلو مكرونة لسان عصفور
3 أكواب شوربة فراخ أو لحمة
1/2 كوب لحمة معصجة
ملح + فلفل
2 حبة حبهان
1/2 كوب سمنة

الطريقة
1- هاتي حلة وسخّني فيها السمنة، وبعد كده ضيفي إليها لسان العصفور مع استمرار التقليب لغاية ما لون لسان العصفور يبقى ذهبي..

2- لما تلاقي إن لسان العصفور بقى ذهبي ضيفي ليه شوربة الفراخ أو اللحمة، واللحمة المعصجة والملح والفلفل والحبهان وقلبيهم مع بعض، وسيبيهم على النار لغاية ما الشوربة تغلي..

3- بعد ما الشوربة تغلي هدي نار البوتاجاز، وغطي عليها، وسيبيها لمدة ربع ساعة لو لغاية ما لسان العصفور يستوي ممكن أنك تضيفي شوربة تاني إذا لزم الأمر.

4- بعد ما لسان العصفور يستوي اطفي البوتاجاز وحطيه في أطباق الشوربة.








سلطة الجزر بالبقدونس

المقادير
معلقة صغيرة ملح
1/2 حزمة بقدونس مقطعة قطعاً صغيرة
4 جزرات متوسطة الحجم
2 فصّ ثوم
1/4 كوب زيت زيتون
عصير ليمونة
أوراق بقدونس "للتزين"
نصف كوب زيتون أسود "للتزين"

الطريقة
1- اغسلي الجزر كويس وابشريه.

2- افرمي الثوم مع الملح كويس وضيفي إليهم عصير الليمون والزيت وقلبيهم مع بعض.

3- ضيفي الخليط السابق إلى الجزر وقلبيهم مع بعض، وبعد كده ضيفي ليهم البقدونس والزيتون الأسود وقلبيهم مع بعض، حطي السلطة في طبق السلطة وزيني الطبق ببعض شرائح الزيتون الأسود وأوراق البقدونس.







سلطة البنجر

المقادير
كيلو بنجر
1/4 كوب زيت (ذرة أو زيتون على حسب رغبتك)
4 ملاعق سكر
2 ملعقة كبيرة خل
ملح وفلفل أسود والكمية على حسب الرغبة


الطريقة
1- اغسلي البنجر واسلقيه وبعد كده قطعيه شرائح صغيرة.

2- أحضري طبقا عميقا واخلطي فيه بالزيت مع الخل والسكر والملح والفلفل، وبعد كده حطي عليهم البنجر المسلوق وقلبيهم كويس مع بعض، وقدميه وبالهنا والشفا.










شوربة المشروم

المقادير
شوربة
بصلة مقطع صغيرة
زبدة
4/1 كوب مشروم
شعيرية
ملعقة كبيرة نشا
كوب ماء
مكعب مرقة دجاج
4/1 ملعقة صغيرة حبهان
4/1 كوب لبن


الطريقة
1- شوحي البصل في الزبدة لغاية ما لونها يبقى ذهبي.

2- ضيفي المشروم والشعرية على البصل وقلبيهم مع بعض، وبعد كده ذوبي النشا في كوب الماء، وحطيها على المشروم والبصل والشعيرية.

3- بعد كده بتضيفي مرقة الدجاج والحبهان، وبعد ما تحسّي إن الشعيرية استوت، ضيفي اللبن.

4- أول ما الخليط يغلي ارفعيه من على النار، وقدميه.. وبالهنا والشفا.









سلطة الزبادي

المقادير
2 حبة خيار
1 فص ثوم مدقوق
1 معلقة صغيرة خل
ملح وفلفل
2 علبة زبادي
2 معلقة صغيرة نعناع جاف ومطحون


الطريقة:
1- اخلطي الزبادي مع الثوم والخل في طبق.

2- قشري الخيار وقطعيه إلى مكعبات صغيرة وضيفيه إلى الزبادي، وبعد كده رشي عليهم ملح وفلفل والنعناع المطحون وقلبيهم مع بعض كويس.

3- بعد كده حطي السلطة دي في التلاجة وقبل الفطار بساعة طلعيها وحطيها في طبق التقديم ممكن إنك تذوقي الطبق بورق النعناع وشرائح الخيار.. وبالهنا والشفا.



سلطة الطماطم بالجبنة الموزاريلا
المقادير:
1/2 كيلو طماطم
300 جرام جبنة موتزاريلا
ملعقة نعناع ناشف
ثمرة بصل
ملعقه كمون
ذَرّة ملح وذَرّة فلفل
2 ملعقه ريحان مفروم
2 ملعقه نعناع أخضر مفروم
2 ملعقه زيت زيتون
2 ملعقة كبيرة خلّ


الطريقة:
1- أول حاجة هنجيب الطماطم وهنقطّعها شرائح كبيرة، وبعدين نجيب الجبنة الموتزاريلا، ونقطعها لشرائح، ونحطها على الطماطم ونسيبهم على جنب.

2- هنجيب طبق تاني ونحط فيه الخلّ والنعناع الناشف والكمون والملح والفلفل والزيت، ونجيب البصلة ونبشرها معاهم، وبعدين نحط عليهم النعناع والريحان المفرومين ونخلط ده كله مع بعضه بالملعقة، ونضيفهم على الطماطم والموتزاريلا.. وبالهنا والشفا.









شوربة السمك
المقادير:
نصف كيلو سمك بلطي متوسط الحجم (أو على حسب عدد الأفراد) ويكون نظيف من الداخل ومغسول جيداً.
2 ثمرة طماطم كبيرة الحجم.
2 ثمرة بصل متوسطة الحجم.
بهارات مشكّلة (ملح- فلفل- كمون- جنزبيل بودرة أو طازج- قرفة)
2 فص ثوم مفرومين
1 ثمرة لومس (أو الليمون الناشف)
فص مستكة وفص حبهان
ملعقة كبيرة زيت


الطريقة:
1- نبشر الطماطم والبصل مع بعض ونضيف عليهم البهارات المشكلة.

2- نفرم الثوم ونحطه في طبق لوحده.

3- نحط ملعقة الزيت في الحلة بتاعتنا، ونحط فيها المستكة والحبهان، ثم نضيف الثوم المفروم حتى يصفرّ، ثم نضيف البصل والطماطم اللي عليهم البهارات ونقلب كويس.

4- نضيف عليهم حوالي لتر ماء دافئ أو ساخن، ونحط الليمون الناشف، ونسيبهم لحد ما يغلوا مع بعض.

5- نضيف السمك إلى الشوربة ونتركه من 5 إلى 10 دقائق بالكتير علشان ما يتهريش.

6- بعد ما يستوي نشيل الغطا من عليه، ويقدم ساخن مع الأرز الأبيض وطبعاً السلطة الخضراء.. وبألف هنا وشفا ويا رب تعجبكم بإذن الله.






سلطة الفاصوليا البيضة
المقادير:
كوب كبير فاصوليا بيضاء.
2/1 كوب بقدونس مقطع قطع صغيرة.
بصلة كبيرة.
3 ملاعق كبيرة عصير ليمون.
ربع كوب زيت ذرة.
ملح وفلفل.

الطريقة:
1- أحضري الفاصوليا وانقعيها في مية لمدة ساعتين، بعد كده اسلقيها في المية لمدة 2/1 ساعة أو لغاية ما تلاقيها استوت.

2- بعد ما تستوي اغسليها وحطيها في مصفاة علشان تصفي المية اللي فيها، وبعد ما تبرد حطيها في الثلاجة.

3- وقبل الميعاد اللي هتقدميها فيه بساعة، خرّجيها من التلاجة وحطيها في طبق التقديم، وقطعي معاها شرائح بصل، وضيفي إليهم البقدونس والملح، والفلفل، وعصير الليمون، والزيت وقلبيهم مع بعض كويس.. وبالهنا والشفا.











فتة الكوارع بالخل والثوم
المقادير:
كوارع عجالي "خلي بالك إنك تشتري الكوارع الصغيرة؛ لأن طعمها بيبقى أحلى"
أرز "الكمية على حسب العدد"
2 معلقة كبيرة ما ورد
2 ثمرة بصل كبيرة
2 ثمرة جزر
ملح وفلفل
ورق لاورا
حبهان
قرفة
زبدة
ثوم
خل
عيش محمص بالزبدة أو في زيت زيتون

الطريقة:
1- أحضري الكوارع، واغسليها كويس جدًّا بالملح والفلفل ويُفضّل لو سبتيها منقوعة في ماء فيه ملح وفلفل لمدة ساعتين أو ثلاثة.

2- بعد كده اسلقيها على النار، ومعاها البصل وفصوص ثوم صحيحة والجزر والحبهان وورق اللاورا، بس خلي بالك إنها بتعد وقت طويل شوية على النار.

3- في أثناء ما الكوارع بتستوي على النار، ابدئي حضري الرز، وأول حاجة تعمليها إنك تغسليه كويس، وبعدين تشوّحيه في الزبدة على النار لغاية ما يبقى مفلفل والميه اللي فيه تنشف، وبعد كده ضيفي ماء الورد ومعلقة صغيرة قرفة مطحونة وملح، وقلبيه كويس على النار، وبعد كده اسقيه بشوربة الكوارع وسيبيه يستوي.

4- بعد كده ابدئي اعملي التقلية؛ وهي عبارة عن رأس ثوم مفرومة وبتشوحيها على النار في زيت زيتون أو زبدة لغاية ما لونها يبقى ذهبي وبعدين ارفعيها من على النار، وضيفي عليها كمية مناسبة من الخل، وممكن تبشري عليها ثمرة طماطم.

5- الخطوة الأخيرة اللي هتعمليها إنك تجيبي الصينية، وتحطي طبقة خفيفة من الرز، وبعدين عليها العيش، وبعدين باقي الرز، وبعدين تخلي الكوارع من العظم وترصيها على الرز من فوق، وبعدين ترشي تقلية الثوم عليها وتحطيها في الفرن شوية يعني مش أكتر من ربع ساعة علشان الكوارع تتشوح معاكِ.. وبالهنا والشفا.










سلطة البطاطس بالمايونيز

المقادير
3 ثمرات بطاطس مسلوقة
5 فصوص ثوم مفروم
2 معلقة مايونيز
ملح وفلفل
عصير ليمونة

الطريقة
قشري البطاطس وقطعيها لقطع صغيرة، وبعد كده اهرسيها كويس أوي مع الثوم المفروم، وبعد كده ضيفي المايونيز والملح والفلفل وعصير الليمون وقلبيهم كلهم مع بعض، وممكن تضربيهم في الخلاط علشان المكوّنات كلها تتجانس مع بعض، وبعد كده حطيها في طبق التقديم وممكن تزينيها بأعواد البقدونس.. وبالهنا والشفا.








سلطة الكول سلو

المقادير
نصف كرنبة "وممكن تستخدمي الكرنب الملون سواء الأحمر أو البنفسجي"
2 ثمرة جرز متوسطة الحجم
كوب أو كوبين زبادي
مايونيز
سكر

الطريقة
1- اغلسي الخضار كويس، وأحضري الكرنب وقطعيه لشرائح رفيعة، وابشري الجزر.

2- اخلطي الزبادي مع المايونيز والسكر، والكمية بتاعة السكر والمايونيز بتكون حسب رغبتك، بس لازم تاخدي بالك إن الخليط لازم يكون تقيل شوية.

3- أحضري طبق التقديم، وقلّبي فيه خليط المايونيز والسكر والزبادي مع الكرنب والجزر، ودخليه الثلاجة شوية قبل التقديم.