محشى الكرنب ... بالتفصيل المملللل ... للمبتدئين
المكونات حسب حجم الكرنب انا استخدمت حجم وسط
- نفصل اوراق الكرنب بالسكين من عند العنق بهدوء
- نكون محضرين حله كبيره فيها مايه و ملح و كمون و لما المايه تغلى نبدأ بوضع ورقه او ورقتين او اكتر حسب حجم الاوراق ل 3 : 4 دقائق مجرد بس انها تذبل و ننشلهم من المايه بهدوء بردو عشان متتقطعش و نحطهم فى مصفاه و هكذا حتى ننتهى من سلق كل الاوراق
- نحضر الحشو و انا بعمله من غير تسبيك و مقاديره تقريبيه
* 4 كوب ارز مصرى مغسول و مصفى من الماء جيداً
* رابطه ممتلئه من كل من ( بقدونس - كسبره - شبت ) مغسوله و مفرومه
* 6 حبات طماطم مفرومه
* 3 بصله متوسطه مفرومه
* ملعقه كبيره ثوم مفروم
* خليط التوابل : الاساسى ملح و فلفل و انا بضيف رشة ( بهارات - زعتر - كسبره جافه ) و ممكن شطه حسب الرغبه
* مقدار من معجون الطماطم
* زيت
- نضع كل المكونات على بعض و نضيف معجون الطماطم لحد الحشو ما يبقى لونه احمر
- نأخذ ورقه ورقه من اوراق الكرنب و نثنيها على 2 بالطول و بعدين نقطعها شرائح بالعرض و نأخذ كل شريحه نقطعها لقطع اصغر مع ازالة العرق و توزيعه فى قاع الحله اللى حنسوى فيها و نرص الوريقات فى صينيه ( انا بحب اعمل الخطوه دى عشان لما ابتدى احشى ابقى سريعه )
- نبتدى نحشى الورق و كل اصبع نساوى حروفه بالسكين من الجانبين اذا احتاج و نرصهم فى الحله اللى فرشنا قاعها بالعروق لحد ما نخلص و نكون احنا كمان خلصنا

- نوزع فوق الوش قطع من السمن البلدى او الزبده
- نسخن مقدار من المايه او الشوربه و ندوب فيها ملح و ملعقة معجون طماطم و نضعه على المحشى ( مشششششششش كتير يدوب يغطى الوجه ) و نهز الحله عشان المايه او الشوربه تتخلل الطبقات
- نحط الحله على النار و نغطيها طبعاً و نسيبها تغلى غلوه بقوه و بعدين نوطى النار و نحط الشياطه تحت الحله و كل فتره بردو نهز الحله و نسيبها حتى ينضج المحشى و ناكل بقه
و بالهنا