لو حسّيتي إن الشاورما نشفت شوية أثناء التسوية ممكن تحطّي عليها شوية ميه صغيرين



خلصت الامتحانات، وبدأت المصايف، وطبعا في المصيف بنكون عايزين ناكل أكلات سريعة ومانقفش في المطبخ كتير، أو نكون محضّرين الأكل من قبلها، علشان كده في عددنا النهارده هنقدّم لك وصفات لأكلات صيفية سريعة وفي نفس الوقت مغذية ولذيذة؛ تابعونا..

شاورما فراخ أو لحمة
المقادير:

  • 3/ 4 كيلو صدور فراخ أو لحمة فيليه
  • 2 فصوص حبّهان مفروم
  • ملعقة صغيرة بهارات
  • فصين ثوم مفروم
  • 1/ 4 كوب خل
  • عصير ليمونة
  • كوب زبادي
  • ملح وفلفل


لعمل الصوص:

  • كوب طحينة
  • فصين ثوم مفروم
  • 1/ 4 كوب عصير ليمون
  • 2 ملعقة كبيرة زبادي


الطريقة:
1- اخلطي كل المكونات (الزبادي- الخل- الثوم- ليمون- بهارات- ملح وفلفل- حبهان) ولو حسيتي إنها جافة شوية ممكن تحطّي عليها ملعقة زيت.

2- قطّعي الفراخ أو اللحمة شرايح رفيعة، وحطّيهم على التتبيلة، وقلّبيها كويس، وسيبيها في التتبيلة في الثلاجة لمدة 8 ساعات أو ممكن تسيبيها طول الليل.

3- بعد كده طلّعيها من التلاجة، وشوّحيها في حلة صغيرة أو طاسة كبيرة لمدة 45 دقيقة أو لحد ما تستوي.

4- لو حسّيتي إنها نشفت شوية أثناء التسوية ممكن تحطّي شوية ميه صغيرين، بس خلّي بالك إنها ماتستويش أوي علشان الصوص اللي فيها ما ينشفش.

5- في الوقت ده حضّري الصوص اللي هتقدّميه مع الشاورما، وكل اللي عليكي إنك تخلطي كل مكونات الصوص مع بعض، وتقلبيهم كويس وقدّميه مع الشاورما.. وبالهنا والشفا.

********************
ممكن تقدّميها مع أي صوص تحبيه



فاهيتا الفراخ أو اللحمة
المقادير:

  • 1/ 2 كيلو صدور فراخ أو فيليه لحمة
  • ملعقة صغيرة بابريكا
  • 3 ملاعق كبيرة زيت
  • ثمرة فلفل أخضر
  • ثمرة فلفل أحمر
  • بصلة متوسطة
  • ملعقة كمون
  • 2 ملعقة خل
  • ملح وفلفل
  • ليمونة


الطريقة:
1- قطّعي الفلفل والبصل والفراخ شرايح رفيعة بنفس المقاس تقريبا، وبعدين حطّي عليهم الكمون والبابريكا.

2- حطّي عليهم عصير نصف ليمونة والزيت والخل، وتبّليهم بالملح والفلفل وقلّبيهم كويس، وسيبيها شوية في التتبيلة لمدة 5 دقائق.

3- حطّي شوية زيت في جريل أو طاسة كبيرة وسخّنيها جامد وبعدين شوّحي فيها الفراخ بالخضراوات لمدة من 6 : 8 دقائق أو لحد ما الفراخ تستوي.

4- بعد ما تشوّحي الفاهيتا، رشي عليها عصير نصف ليمونة، وقدّميها بالهنا والشفا.

********************




ادهني الجريل أو الطاسة بزيت وسخّنيها على نار متوسطة



مارجريتا فراخ
المقادير:

  • 3/ 4 كيلو صدور فراخ
  • 1/ 3 كوب عصير ليمون
  • 1/ 4 كوب زيت زيتون
  • 2 ملعقة كبيرة كزبرة مفرومة
  • فصين ثوم مفروم
  • ملعقة صغيرة شطة
  • ملح وفلفل
  • بشر ليمونة


الطريقة:
1- اخلطي كل مكونات التتبيلة وقلبيها وبعدين حطي فيهم الفراخ، وحطيها في الفراخ لمدة ساعة أو سيبيها طول الليل.

2- ادهني الجريل أو الطاسة بزيت وسخّنيها على نار متوسطة، وشوحي الفراخ لمدة 4 : 5 دقائق على كل جانب، وقدّميها.. بالهنا والشفا.

********************




لو عايزاه مقرمش ممكن تفكي الفويل وتحطيه في الفرن شوية قبل ما تقدميه



حواوشي مصري
المقادير:

  • خبز شامي أو بلدي
  • 1/ 2 كيلو لحمة مفرومة
  • ملعقة صغيرة حبهان مطحون
  • كوب مكعبات طماطم
  • ملعقة صغيرة بهارات
  • ملعقة صغيرة قرفة
  • حزمة كزبرة
  • ثمرة بصل
  • ملح وفلفل
  • ورق لاورا


الطريقة:
1- اخلطي كل المكونات مع بعض، وبعدين خدي من خليط اللحمة ده وحطي داخل كل رغيف.

2- غلفي العيش بورق الفويل ورصيه في الفرن وسيبيه لمدة 1/ 2 ساعة واختبريه قبل ما تطلعيه.

3- لو عايزاه مقرمش ممكن تفكي الفويل وتحطيه في الفرن شوية تاني، وقدّميه.. بالهنا والشفا.

خلصت وصفات النهارده..
استنونا كل أسبوع مع عدد جديد..