كريم بروليه..
الحلوى الفرنسية اللذيذة والفاخرة ، سهلة جدا وما تاخذ وقت بالمره منج سواء بالتحضير أو الطبخ ..
انا لما اسويها لضيوفنا اذوب الكراميل جدامهم بالصالة جد طريقة ميزة خصوصا وانت تاكلين الكريم نصفة حار والصف الاخر بارد مزيج لذيذ ومثير للحواس عن تجربة ..

المقادير:



6 صفار بيضات متوسطة "اذا كانت كبيرة 4 بيضات"
500 ملي كريمة سائلة
8-10 م ك سكر ، 2 م ك سكر للكراميل
م م فانيليا
رشة ملح

الطريقة:
افصلي الصفار عن البياض وخليه بالطاسة العميقة ، اخلطي الصفار مع الملح والفانيليا وخليه على جنب ..





اخلطي السكر مع الكريمة السائلة ودخليهم الماكرويف 2-3 دقايق ، لازم الكريمة تكون حارة بس ما تغلي <<< مهم جدا انها ما تغلي ..





بس تطلعين الكريمة الحارة اخلطي شوية كريمة حارة مع الصفار بسرعة عشان ما يستوي الصفار ثم ضيفي كمية اخرى من الكريمة واخلطي بسرعة وهكذا الى ان ينتهي المقدار كله ..



وصبي الخليط في الأوعية الخزفية البيضاء اللي تدخل الفرن او اي اوعية عندج للفرن ، صفي الاوعية في صينية الفرن وصبي ماء مغلي في الصينية الى نص الاوعية بالضبط ..



دخليهم الفرن على حرارة 180 لمدة 40 دقيقة ..





اول ما تطلعينهم من الفرن راح يكون الكريم طري وايد ، دخليهم الثلاجة لمدة 6-12 ساعة لتبرد ..



بعد ما نطلعها من الثلاجة..



عند التقديم ضعي م م سكر واحرقيه ليتكرمل "يصير كراميل" وقدميه على طول وبالعافية ..