معظمنا خلاص اشترى خروف العيد وحضرنا خلاص للاضحيه ربنا يتقبل من الجميع



وطبعا صرفنا كل الفلوس ال حوشناها صح ايوه طبعا
العيد وتفريق اللحمه على الاهل والاحباب مش هنلاقى غير جزء بسيط من اللحمه لينا ماهو ده الطبيعى

وبعد العيد والعيديه نلاقى ان الميزانيه انتهت
ومفيش مصروف يكمل باقى الشهر طبعا متعودين على كده صح

ونيجى بقى نقول الحقوناااااااا الميزانيه باظت اكمل باقى الشهر ازاى .. اعمل اكل ايه يبقى موفر .. اوفر ازاى فى الفطار والعشاء .. الحلويات
كل ده يانهار ابيض

علشان كده انا فضلت افكر وافكر ولقيت الفوكيره ال هى
قولت بقى اساعد اخواتى واحبابى وانظملهم جدول لاكلات فى الشهر موفر وكمان التوفير فى كل حاجه فى البيت وكمان بالميزانيه الكاملهايه رايكم بقى فى الهديه دى

تعالوا بقى نشوف جدول اكلات شهر نوفمبر

بما اننا هيبقى عندنا لحمه وال مدبحش بيجيله لحمه برضو هنستفاد بيها طبعا فى الاكل ونوفر حقها مش لازم نستفاد حاجه من الخروف وكمان انا هاقلل كميات اللحوم لان طبعا غاليه وكمان للبنات ال مش هيدبحوا يعنى برضو نراعى كل الناس


وعلى فكره يابنات ده جدول لاسره متوسطه يعنى حوالى 4 افراد وال يحب يزود يزود وال ينقص ينقص براحتكم وكمان انا مش عامله ميزانيه محدده لا انا عامله ميزانيه تنفع لاى حد المصروف متحدد للاكل والشرب فقط



وده الجدول

1- فاصوليا خضراء + فراخ + رز + سلطه
2- باقى الاكل + شوربه لسان عصفور
3- صينيه مسقعه باللحمه المفرومه + سلطه + عيش
4- شوربع عدس
5- صينيه سمك + رز + سلطه
6- ملوخيه + عيش + بذنجان مخلل
7- صينيه كوسه باللحم المفروم + رز + سلطه
8- محشى كرنب + فراخ + شوربه
9- باقى الاكل + شوربه خضار
10- كفته مشويه + مكرونه + سلطه
11- بيض شكشوكه + فول بالقوطه + سطه
12- سمك مقلى + رز + سلطه
13- كشرى
14- صينيه جلاش باللحمه المفرومه وجلاش بالجبنه + سلطه
15- صينيه بطاطس بالكفته + رز + سلطه
16- باقى الاكل + شوربه شعيريه
17- كبده + مكرونه + سلطه
18- كفته التونه + عيش + بطاطس شيبسى
19- سمك مشوى + رز + سطه
20- حواوشى
22- عجه بيض + فول بالطحينه + بذنجان مقلى
21- كبد وقوانص + مكرونه + سطه
22- بسله + فراخ + رز
23- باقى الاكل + شوربه لسان عصفور
24- كفته داوود باشا + رز + سلطه
25- بيتزا
26- سمك + رز + سلطه
27- كبده + مكرونه + سلطه
28- محشى كوسه وبذنجان + فراخ + شوربه
29- باقى الاكل + شوربه
30- بطاطس بيوريه + بيض + بذنجان

نيجى بقى للحسابات ونشوف الميزانيه هتتكلف كام

اللحوم :
4 فراخ ب 100 جنيه
2 كيلو لحمه مفرومه من الجيش ب 70 جنيه
كيلو كبده من الجيش ب 35 جنيه
4 كيلو سمك ب 40 جنيه
كده حوالى 245 جنيه

خزين البيت
شيكاره رز 5 كيلو ب 20
ازازه زيت للاكل ب 12
ربع عدس بجبه + ربع عدس اصفر ب 7
لفه جلاش ب 3.5
2 كيلو مكرونه مشكله ب 8
دقيق ب 3
كده حوالى 54 جنيه

كده مصاريف اللحوم وخزين البيت ب 300 جنيه

استنونى ياقمرات لسه فيه توفير كتييييييييير
نيجى بقى للتوفير فى الفطار والعشاء

كتير بيقولوا بنصرف فيه كتير اوى واستغرب ليه
ماهو ممكن نوفر فيه كمان
تعالوا نشوف ازاى

هنجيب فى الشهر لاسره برضو متوسطه

كرتونه بيض ب 18 جنيه
كيلو فول للتدميس ب 9 جنيه
كيلو فول مدشوش للطعميه ب 5 جنيه
كيلو جبنه قريش ب 10 جنيه
كيلو جبنه بيضاء ب 16 جنيه
برطمان مربى ب 6 جنيه
4 علب تونه ب 12 جنيه
علبه مثلثات ب 4 جنيه
كده حوالى 80 جنيه

و 20 جنيه للعيش

يبقى بالظبط 100 جنيه حاجات فطار وعشاء متنوع
يبقى توفير ولا مش توفير بقى




نيجى للخضار نشوف ايه التوفير فيه

كل اسبوع اى اسره متوسطه ياترى ممكن تحتاج ايه

2 كيلو طماطم ب 4
3 كيلو بطاطس ب 9
نصف كيلو خضار يتقسم مرتين ب 3
نصف كيلو خيار ب 1.5
نصف فلفل ب 1.5
كيلو بذنجان ب 3
ومره كرنبه او كوسه
يبقى كده 28 جنيه

يبقى فى الشهر حوالى 112 جنيه قولوا 115 جنيه



يبقى كده ميزانيتنا بالظبط
300+100+115 = 515 جنيه

وممكن توصلوها ل 550 جنيه بالفاكهه

ايه رايكم بقى بيتهيقلى ميزانيه كويسه وموفره لاسره اربع او خمس افراد فيها كل حاجه من لحوم وخزين بيت وفطار وعشاء وخضار

بنات الميزانيه دى للاكل والشهر بس يعنى محدش يقولى كهرباء ودروس انا ماليش دعوه بيها
انا عامله ميزانيه عامه لاى حد مش لشخص معين



يارب الجدول يعجبكم والميزانيه تعجبكم

ومتنسونيش بالدعاء