أروع فطير مشلتت بالخطوات المصورة من مطبخ الشيف
الفطير المشلتت



استخدمت دقيق فاخر كيسين من ده يعني المجموع (2 كيلو)




وعلى كل كيلو مقدار 1/2 معلقة كبيرة ملح




وحنحتاه ماء عادي (حسب الدقيق ما ياخذ) والفطير يا بنات محتاج عجن كويس . وأنا عملتها لما كان المزاج رايق ^_^ فعجنت بإيدي مش بالعجانة وافتكرت خالاتي في مصر لما كنت صغيرة كانو بيعجنو بالخمس والستة كيلو وأنا عجنت 2 كيلو وتعبت ^_^ كفاية رغي ونكمل




هنا شكل العجين بعد ما خلصنا من العجن . خدت حوالي نص ساعة ومحتاجين عجينة طرية ولينة ومتماسكة




عجينة الفطير محتاجة ترتاح كويس جدا علشان تفرد معانا بعد كدة بكل سهولة . بعد ما عجنتها قطعتها لكور ودهنتاه بالزيت وحطيتها في صواني مدهونة بالزيت ومتبطنة بورق الزبدة وغفلتها بالنايلون ودخلتها الثلاجة واستخدمتها تاني يوم


بصو هنا بقى تاني يوم لما طلعتها من التلاجة ملاحظين ازاي العجينة متماسكة ولنية وجاهزة للفرد^_^






بصو يا حبايب قلبي ميزة ورق الزبدة . بما اني ال عجينة لينة فممكن تلزق بالذات لو خليتيها في الثلاجة زيما ما انا عملت ليوم كامل




هنا يا فتوكات نلاحظة العجينة بتمط ازاي . وده سر الفطير لازم تبقى العجينة كده مهما مطتيها ما تتقطعش . وممكن نوصل للقوام ده عن طريق طول مدة العجن ونخليها تراح لفترة طويلة علشان مادة الجلوتين الي في الدقيق تدقينا القوم الي بيمط زي الصورة




حنحتاج طبعا لسمنة(يا بختكو انتو في مصر ممكن تستخدمو السمنة البلد وبتبقى جميلة في الفطير)





عملية فرد الفطير


ناخذ حتى ونبدأ نفردها بإدينا أو بالنشابة



ونبدأ نشد الأطراف بالطريقة دي



وبكل بساطة يا فتوكات حتمط معانا ومش حتتقطع لاني العجينة ارتاحت لفترة طويلة . بصو ايدي واضحة من تحت العجينة ازاي وعاملة زي الشيفون (تعبير بليغ ^_^)



وما ننساش يا فتوكات نفرد الاطراق علشان الفطير يطلع كلو مورق عندنا


كده بعد ما فردنا أول كورة عجينة لاحظوا شفافة جدا ومفرودة حلو


نرش السمنة ونزعها على كل العجين



ونبدأ نطوي الفطير على بعض بالشكل ده (بصو ال3 صور الي تحت)








وكده بعد ما طوينها على بعض . دي يا فتوكات نمرة واحد



حنفرد كورة عجينة تانية بنفس الطريقة ونحط (الفطيرة نمرة واحد) جواها بالطريقة دي


وندأ نطوي جوانب العجينة علشان تغلف الفطيرة الي جوة (دي فطيرة نمرة2)



ودي تالي طبقة(الفطيرة نمرة3)


الحمد لله هانت أخر فطيرة أهي وحخلص تعبت ورجلي وجعتني من الوقفة والفرد






كدة ربنا سهلها ^_^ وخلصت لف كور كور العجينة وطلعو بسم الله ماشاء الله 5 فطيرات. وسبتهم يرتاحو لحوالي الساعة علشان أعرف أفردهم



هنا يا حبايب قلبي شكل الفطير من قريب لما ارتاح ملاحظين ازاي .ممكن يتفرد بسهولة . على العكسي لو فردنها بعد عميلة التوريق




هنا فردت الفطيرة على كل الصينية



ودي صوره أوضح لشكل الفطير المفرود





وهنا الحبايب متجمعين على الخير ^_^


طريقة خبز

الفطير محتاج لفرن حامي جدا جدا . أنا خبزته على حرارة 200 تقريباً لاحظوا هنا شكل الفطيرة وهي في الفرن بعد حوالي العشر دقائق على طول بدأت تاخذ لون خفيف ونفخت ازاي من تأخير ورق العجينة والسمنة الي بين



بصو هنا صورة أوضح لشكلها واضح انها منفوخة ولما ضغط عليها بالسيكن دخلت شوي



وبعد حوالي الربع ساعة طلعتها واتأكدت لو القعر اتحمر ولا لسه (بس الحمد لله كده كويس جدا وده المطلوب لون دهبي جميل)


وده شكل الفطيرة من فوق




ودي صورة أوضح لاحظوا الفطيرة عبارة عن رقاقات ازاي

ودي صورة تانية لزوم التجويع


وده شكلها من تحت لاحظوا شكل التوريق واضح ازاي



وبعد ما خرجت من الفرن دخلتها في كيس علشان تفضل طريقة (يانهارأبيض ايه ده تصدقو ما خدش بالي اني الكيس هو كيس الفرن الي بنشتري منو العيش) لا ومكتوب عليه أنوع الخيز (يعني عملي اعلان مجاناً)يا دي الكسوف^_^



ودي لصاحبتي أول ما طلعت من الفرن لفيتها بورق السلولفان

.



ولفتيها كويس . ورجعت لفيتها بنايلون التغليف علشان تفضل طريقة


يارب طريقتي في الفطير تكون عجبتكم يا فتوكات . ومش عايزة غير دعوة حلوة بظهر الغيب بالزوج الصالح التقي وربنا يحنن قلب أخواتي عليا

بحبكم جداً