هوة ده البيتي فور اللي بجد للشيف أميرة شاكر
ازيكم يا فتوكات
من غير لت وعجن كتير ندخل في الموضوع
المقادير
1-عدد4مج زبدة نيوزيلندي أصلي(زبدة تسيحيها على النار لغاية ماتغلي شوية صغيرين وماتحوليهاش لسمنة نهائي وبعدين تسيبيها تبرد في درجة حرارة الغرفة)
و المج يبقى مليان زي الصورة كده(ال4مجات تقريبا كيلو زبدة)

2-عدد2مج سكر مطحون ناعم جدا ومنخول بالمنخل الحرير بتاع نخل الدقيق علشان مش عاوزين أي ذرة سكر خشنة نهائي
وطبعا بتعايري بنفس المج القديم ويبقى مليان برضه

3-عدد3صفار بيض عادي مش بلدي وبيضة واحدة كاملة
4-تقريبا كيلو وربع دقيق زيرو منخول بالمنخل الحرير
5-ملعقة صغيرة ممسوحة بيكنج بودر
6-كيس فانيليا
الطريقة الجبارة لعمل البيتي فور ركزي معايا بقى في اللي جاي يا فتوكة منك ليها
أولا تحطي السكر على الزبدة

وبعدين تضربي بالمضرب الكهربي وده هيكون شكله في البداية

تفضلي تضربي لغاية مايبقى شبه الكريمة ولونه فاتح قوي وقوامه تقيل زي كده

تضربي ال3صفارات والبيضة الكاملة مع كيس الفانيليا بالمضرب الكهربي مع بعض 5دقائق ثم تضيفيهم للخليط السابق وتفضلي تضربي تاني لغاااااااااااااااية مايبقى الخليط شبه الكريم شانتيه (يعني دواير المضرب مابتروحش من الخليط نهائي) زي كده

خدي بالك بقى من اللي جاي ده ركزي شوية
اغسلي ايدك حلو ونشفيها حلو قوي وابتدي حطي الدقيق ومعلقة البيكنج بودر على الخليط شوية بشوية وتعجني بايدك اليمين وتفضلي تضيفي الدقيق وكل شوية تحطي صباع ايدك الشمال في العجين (لو طلعتي صباعك ولقيتي فيه عجين يبقى لسه)ضيفي تاني دقيق لغااااااااااااااااااية ماتحطي صباعك الشمال ويطلع فااااااااااااااااااااااااضي ونظيف تماما هنا بقى تبطلي تحطي دقيق تاني ويبقى العجين ممتاز(يعني هوة بكدة كمية الدقيق هتبقى اكتر من كيلو واقل من كيلو وربع تقريبا)والعجين شكله هيبقى كده

ريحي نفسك بقى شوية وشوفي اللي وراكي في الشقة وسيبي العجين يريح كده نص ساعة وتكوني مغطياه طبعا
وبمكنة البيتي فور وزعي العجين في الصينية ويكون حرفها صغير زي كده

وممكن الشكل ده برضه شغاااااااااااااااااااااااااال

حطيهم في الفرن بعد ماتكوني مولعاه من قبليها لمدة ربع ساعة ولما يستوي ماتسيبيش وش البيتي فور يتحمر يادوب من الجنب يدي لون محمر خفيف زي كده

تسيبي الصينية تبرد شوية وبعدين تطلعي البيتي فور من الصينية كده

ممكن تسيبي شوية عجين وتضيفي ليه شوية كاكاو خام تفضلي تحطي كاكاو لغاية ماتوصلي للون البني اللي بتحبيه انت وزوقك بقى

وده شكله في الصينية

ودي بقى الكمية كلها بعد مافرغتها في صينية واسعة وعريضة علشان مايتكسرش

وده الشكل التاني

للتزوييييييييييييييييييييق
مكسرات مطحونة
مربى
جوز هند مبشور ناعم
شيكولاته خام مبشورة
طبعا المربى للزق البيتي فور مع بعضه والباقي للتزويق من على الوش

هوة ده البيتي فور ولا بلاش اتفرجو بقى على الشكل النهااااااااائي

مفيش داعي بقى أقوللكم على طعمه تحفة ودايب دوووووووووووووووب
اتفضلوا كلوا وبلاش أنا هاهاهاهاها


hgfdjd t,v hggd f[] ggadt Hldvm ah;v ggadt hggd hgfdjd