طبعاً كلنا عارفين إن عيد الأضحى بيحلى في لمة العيلة على السفرة على أطباق الفتة، ويا سلام على حفلات الشوي اللي بتتعمل بالليل، ما فيش أحلى من كده..

وأكيد طبعاً نفسك في مرة تبيّني لأسرتك إنك ست بيت شاطرة وتدخلي المطبخ وتعملي الأكل بنفسك، بس كل مرة بتخافي علشان ما بتعرفيش تطبخي كويس وخايفة الأكل يبوظ وكل اللي قاعدين يضحكوا عليكِ..

بس ولا يهمك مِن حاجة طول ما إحنا موجودين؛ لإننا قررنا إننا نقدّم لكِ أكتر من طريقة لعمل الفتة، بالإضافة إلى أكتر من طريقة جديدة لعمل اللحمة الضاني..



يلّا بينا على المطبخ...


فتة بالخل والثوم

أوّل طبق معانا النهارده هو طبق الفتة بالخل والثوم؛ وده لأن ما فيش حد في مصر كلها ما بيفطرش فتة في أول يوم العيد.. ودي أحسن طريقة ممكن إنك تعملي بيها الفتة في العيد..

المقادير:

• كيلو لحمة ضأن.
• 3 أكواب أرز.
• بصلة كبيرة ومقطعة قطع صغيرة.
• بصلة كبيرة مقسومة نصفين.
• 2 فص حبهان.
• ملعقة قرنفل.
• 6 فصوص ثوم مفرومة.
• 2 رغيف خبز محمص.
• نصف ملعقة صغيرة مبشور جوزة الطيب.
• أعواد قرفة.
• ورق لاورا.
• ملح.
• كوب كبير عصير طماطم.
• ملعقة كبيرة سمن.
• ملعقة كبيرة صلصة طماطم.
• ملعقة خل أبيض.

الطريقة:

1- اسلقي اللحمة الضاني وضيفي إليها عند السلق البصلة المقسومة نصفين وورق اللاورا وفص الحبهان وملعقة القرنفل والملح وسيبيها لغاية ما تستوي.

2- أثناء ما اللحمة بتستوي أحضري الأرز واغسليه، وأحضري صينية متوسطة الحجم وحطيها على النار وحطي فيها ملعقة ونصف سمنة، وضيفي إليها الأرز وقلبيه على النار لمدة خمس دقائق، بعد كده أحضري ماء وضيفي إليه شوية ملح وضيفيه للأرز وسيبي الأرز على نار هادية لغاية ما يستوي مع التقليب من وقت للتاني.

3- أثناء ما الأرز بيستوي أحضري بصلة وقطعيها قطع صغيرة وحمّريها في السمنة لغاية ما تلاقي لونها بقى أصفر، ضيفي إليها الثوم مع التقليب لمدة خمس دقائق، بعد كده ضيفي إليهم كوب عصير الطماطم والصلصة ومعلقة الخل وسيبيهم على نار هادئة لمدة 10 دقائق، بعد مرور عشر دقائق ضيفي إليهم كوب من الشوربة وقطع اللحمة وسيبيهم على النار لمدة ربع ساعة.

4- أحضري صينية وقطعي فيها الخبز المحمص، وضيفي إليه شوربة اللحمة وسيبيهم لمدة عشر دقائق علشان العيش يتشرّب من الشوربة.

5- أحضري طبق كبير وحطي فيه الأرز والخبز ومن فوقهم الصلصة واللحمة... واوعي تأكلي صوابعك وراها.





فتة بالزبادي والثوم

أما لو كنتِ عايزة تبيني للكل إنك ست غير تقليدية، وفي نفس الوقت تعملي فتة؛ يبقى عليكِ وعلى الفتة بالزبادي والثوم، وعلى فكرة طبق الفتة ده مشهور أوي في الشام...

المقادير:

• كيلو لحم ضاني أو بتلو مقطعة قطعاً متوسطة الحجم.
• 2 رغيف شامي محمص.
• ربع كوب طحينة.
• 5 عبوات زبادي.
• 5 فصوص ثوم مفرومة.
• بصلة كبيرة مقطّعة شرائح رفيعة.
• ورق لاورا.
• 2 حبة حبهان.
• نصف كوب صنوبر "اختياري".
• 3 أكواب أرز بسمتي.
• 2 ملعقة كبيرة سمنة.
• 1 كوب خل.
• ربع كوب عصير ليمون.
• ربع كوب زيت ذرة.
• ملعقة صغيرة بهارات.
• ملح وفلفل.

الطريقة:

1- أحضري العيش الشامي وقطّعيه قطعاً متوسطة الحجم، وحمصيه في الفرن لمدة عشر دقائق، أثناء ما العيش بيتحمّص في الفرن أحضري الصنوبر وحمّريه في الزيت أو حمصيه هو كمان في الفرن.

2- أحضري حلة كبيرة وحطي فيها معلقة سمنة وسخنيها على النار، وضيفي إليها البصل وقلبيه على النار لمدة ربع ساعة أو لغاية ما تلاقي إن البصل لونه أصفر ضيفي إليه نص كمية الثوم المفروم اللي عندك، وقلبيهم مع بعض لمدة خمس دقائق كمان.

3- بعد مرور خمس دقائق ضيفي إليهم قطع اللحمة، وقلبيهم مع بعض لمدة ربع ساعة أو لغاية ما تلاقي إن اللحمة لونها أتغيّر من اللون الأحمر إلى اللون البني، ضيفي إليها ماء وملح وبهارات وورق لاورا وحبهان، وسيبيها على النار لمدة نص ساعة أو لغاية ما اللحمة تستوي.

4- في الوقت اللي فيه اللحمة بتستوي أحضري الأرز واغسليه وبعد كده أحضري صينية وحطي فيها معلقتين سمنة واستني لغاية لما السمنة تسخن، وضيفي إليها الأرز وقلبيه على النار لمدة خمس دقائق، بعد كده أحضري ماء وضيفي إليه شوية ملح وضيفيه للرز وسيبيه على نار هادية لغاية ما يستوي.

5- أثناء ما الأرز بيستوي أحضري الزبادي واخلطيه بالطحينة وباقي كمية الثوم اللي عندك وعصير الليمون وربع معلقة صغيرة من الملح والفلفل وقلبيهم كلهم مع بعضهم كويس.

6- أحضري طبق باريركس كبير وحطي فيه الخبز المحمص، وضيفي إليه شوربة اللحمة واستني خمس دقائق، وبعد كده ضيفي إليه الزبادي والأرز وقطع اللحمة والصنوبر وشوية شوربة لحمة، ودخليه الفرن لمدة عشر دقائق وبعد كده خرّجيه... وبألف هنا وشفا..