بما اني شفت الكثيرمن الاخواات غلبت عليهن الحيره في اختيار الارضيات
وهذي المرحله بالطبع كلنا نمر بها لو اردنا أن نعمر بيت او نعمل له صيانه....


وبما اني منذ مده ابحث عن الارضيات بانواعها كي اختارلبيتي الجديد

فصارت عندي خلفيه ولله الحمد لابأس بها


وقررت اني احطي موضوع مستقل بهذا الشي
أفيد البناات في هذا المنتدى الراائع اللي ياما افادنا بأشياء متنوعه وكثيره....

((( مع العلم بان بعض المعلومات بتكون منقوله من عدة مواقع ومنتديات ولكن بتصرف وبدخل فيها رايي الشخصي وتجربتي وتجربة اللي اعرفهم))


قبل لا نبدأ هناك قاعده لازم انحطيها ببالنا

(( قبل اي اختيار لاي نوع من الارضيات اسألي ها السؤال :
هذا اي رقم 1 ولا 2 ؟؟؟والجرانيت لازم تسألين : هل هو فل بدي؟؟؟ وبالطبع رقم 1 احسن شي
والفل بدي هو الاقوى


ثاني شي حاولي تاخذين قطعه من الارضيه (سمبل)وتسوين عليها تجارب في البيت
من ضمن التجارب اكتبي عليها بالفلومستر وخليها دقايق بعدين امسحي
ان شفتي مايتم ولا أثر للون يعني نجح بتجربة الالوان

واحضري ملعقه او مفتاح وشخطي ع الارضيه ان شفتي خطوط ظاهره يعني هذا معرض بالمستقبل لخدوش واي جرة اثاث عليه بتترك أثر

وصبي عليه عصير وبيبسي >>>لاتخلين شي في المطبخ الا تسوينه مواد تجارب خخخخخخ
وشوفيه يتحمل المواد المنظفه والحمضيات عقب ربع ساعه ع الاقل ولا انه يتغير لونه

واخر اختبار حطي القطعه في سطل ماااي وخليها تاخذ دش طووووووووووويل وهي
غرقانه بالماي ليله كامله وعقب طلعيها وامسحيها وشوفيها زين
فيها بقع ولا لا ؟؟؟؟؟؟انا من خلال التجارب شفت نوع من الجرانيت الصيني بقع


هذا دليل انه مايتحمل الرطوبه ويشرب الماي بالتالي بيبقع وع مر الايام بيتكسر


وهكذا ستختارين وانتي مطمنه ومرتاحة البال

والان نأتي للانواع ومزايا كل نوع وعيووبه
وخلونا انسميهم الضيووووووف



)) الضيف الاول هو ((السيراميك(صاحب التصويت الأكثر لدى الجمهوور)



هذا اللي تعودنا نشووفه باغلب البيوتباشكاااااااااال والواااااااااااااان مختلفه
وفي منه انوااع والنوع اللي عجبني بقوته وجماله هو الاسباني ونجح عندي بالاختباااااار
وخذ الدرجه النهاائيه >>> تأثير التدريس علي انتقل حتى للسيراميك ههههههه


مزاياه:
رخيص نوعا ما ،،، الوانه واشكاله متعدده،،، الموزاييك رووعه للحمامات والمطابخ
وهو من انواع السيراميك

عيوووبه:

اهم عيب ان الترويبه اتبين من اطرافه والترويبه هي مادة اللصق اللي يحطونها تحته

والعيب الثاني ان اطرافه تتكسر اذا سحبعليه شي ثقيل طبعا مب كل الانواع

وبعد تظهر عليه ثقوب صغيره بعد مرور الزمن .

واحجامه معظمها صغيره لاتأتي كبييره ((مناسب جدا لدورات المياه))

اللي يفرق السيراميك عن الجرانيت هو ان الجرانيت صبه وحده
اماالسيراميك عباره عن طبقتين يوم تنكسر اللي فوق وهو القشره
المشكله ان اللون البني اللي تحت يظهر وهو طبقة الطين الفخاري


واترككم مع صور متنوعه للسيراميك

(لاحظوا الترويبه بين الحبات (الترويبه هي الجلو اللي ينحط بين كل سيراميكه والثانيه وعلى فكره انا شايفه سيراميك لمطاعم راقيه لون السيراميك بني مسوين له ترويبه رمادي طالع واااااااو ناويه انفذه في مطبخي )

هذه الصورة تم تحجيمها. اضغط على الشريط لمعاينة الصورة بالحجم الكامل. ابعاد الصورة الاصلية 586x488.


(من تصويري الخاص في بيت الاحلام )

سيراميك الجوهره المصري

سيراميك راس الخيمه



شوفوا الموزاييك وهو من انواع السيراميك




الخلااااااااااااااصه نقول للضيف :

تشرفنا بمعرفتك يااخ سيراميك واذا اخترناك في بيتنا لازم نختارك من الدرجه الاولى
واسمحلنا بنسويلك بعض الفحووووصات اللازمه ههههههه


ياحيا الله الضييييف الجديييييييييييييد كششششششخه لكنه مظلوم

((البورسلااااااان))

كشخه لانه يشبه الرخام شكلا ولكنه مظلوم لان كل حد يسميه جرانيت
وهو بعييييييد تماما عن الجرانيت لان الجرانيت هو ماده طبيعيه ماتنحط
داخل البيت هو اللي ييحطونه عند مدخل البيت واللي يحطونه
فوق دواليب المطابخ اكيدعرفتووهلكن انتشر عندنا باسم جرانيت
والعرب اللي في المحلات عادي يعرفونه لكن الهنود
القليل اللي يعرفه بها الاسم

الموهم ماعليكم من الهنود في المحلات قولولهم : شي بورسلان؟؟
ان شفتوهم فجوا عيونهم واستغربوا ،،،قولولهم : جرانيت في؟؟


مزايااااااااااه :

الوانه واحجامه متعدده ،،وشكله مثل الرخام لان مامبينه ترويبه ظاهره
قص ليزر يسمونه يعني اطرافه تتلصق حذال بعض
لهذاالسبب مانشوف مابينه فواصل كأنه قطعه واحده ،،،


وبصراحه بورسلان راس الخيمه ماعليه كلاااام حلو وقوي وينافس البورسلان
العالمي (لكنه اغلى من الصيني تقريبااسعاره مابين ال60 وال100)

وبالطبع البيج الفاتح يناسب كل شي


والبورسلان الاسباني رقم واحد اغلى
ويوجد منه بورسلان اسباني شفته بالشارجه ع شكل باركيه قطعه طوال
المتر بستين



اماالصيني فالناس هاابين فيه رخيص الفل بدي باربعين وشي
((خذت منه للدور الأرضي بعد ماراحت الميزانيه للبناء))
اشكاله تقليد للرخام ويي كبار سايزه (60 ×60 ،،، 70 ×70 ،،ومتر × متر بعد)

على فكره احلى سايز انا اشوفه 60×60 للمساحات المتوسطه

اما المراكز شرات اللي تشوفونه في ارضية كارفور هذيلا سايزاتهم كبار
حللوه بس تناسبهم لان عندهم مساحات كبيره

وبصراحه وايدين اعرفهم مركبين الصيني منه حتى اختي مركبينه من خمس سنين
(وهاكو شزينه ماصار له شي(>>>دعايه للجاينويين يافرحتكم لو عرفتوا عني بتعطوني نسبه خخخخخ


عيوووووبه :

اللامع منه حلو للصالات والميالس بس يباله تنظيف مستمر اي وصخ يبان عليه
ويزحلق لكن ها العيب مايأثر اذا كان في منطقه ماتنداس وايد مثل الميالس
ومن عيوبه بعد ان طاح ياهل علييه الله يحفظه بس منالكسر


وهذي صوور للبورسلان
هذا صيني ((وصدقوني يا اخواتي اهم شي للبورسلان هو طريقة تركيبه ولازم نوقف على راس العمال في البدايه عشان يعرفون الطريقه الصحيحه ويفهمون انا نحب الشغل المتقن وبعدين نتركهم،،
ترى في عمال يركبون البورسلان وكأنه سيراميك ويخلون ترويبته بشعه



هذا مطفي صغار اظني 40×40

وهذا بورسلان اسباني مطفي يصلح لغرف المعيشه
هذه الصورة تم تحجيمها. اضغط على الشريط لمعاينة الصورة بالحجم الكامل. ابعاد الصورة الاصلية 650x488.



وهذا بورسلان ايطالي للحمامات

هذه الصورة تم تحجيمها. اضغط على الشريط لمعاينة الصورة بالحجم الكامل. ابعاد الصورة الاصلية 654x872.

وهذا البورسلان الصيني (نخب اول ) شفتوا كيف تركيبه كأنه قطعه واحده
(من تصويري لحمام الاولاد)



وهذا انا ركبته لصالة الدور العلوي (بورسلان راس الخيمه مطفي) لونه رمادي محايد
وسايزه 45 ×45 هذا هو بعد التركيب

شوفوا يابنات هذي صور بورسلان من راس الخيمه
لاحظوا الاطراف مستويه بينما السيراميك من الاطراف اخف سماكة من السراميك نوعا ما وخلفياته متدرجه بالالوان بعضها يأتي بالوان غامقه وهو الاقوى وهذا يدل على زيادة استوائه بالافران اما البورسلان خلفياته فاتحه نفس لون البورسلانه تقريبا )


وهذي ارضية احدى فروع سيرايك راس الخيمه والشي اللي يضحك
ان الارضيه (بورسلان صيني سايزه 80 ×80) >>> لايق عليهم المثل باب النجار مخلع خخخخ وبصراحه لمعته رائعه ومتحمل الدوس المستمر في المحل
شوفوه كنه منظره ماشالله>>صدق صارت دعايه للجاينويين




الخلااصه كلمه للضيف :

سامحنا يابورسلااان يخلطون مابينك ومابين الجرانيت ولكن ماعليك
قدرك محفوووظ وعقب ماعرفنا عن متانتك وقوتك بنختارك بس
لاتستاانس وااااااايد بنسويلك بعد الفحوصاات اللااازمه خخخخخخخخخ





أسمع حد يدق الباااااااااب

منوووو؟؟؟؟ اقرب ... اقرب


ياحياااا الله بصااحب السيااااااااده ،،،،

ياحياااااااا الله بالشيخ
رخـــــــــــــــــــام

اتفضل نفرش لك الارض بالووورد


((طبعا هذا الضيف عزيز وغالي >>وهو غالي بالفعل
من أرقى الأرضيات ولا تقولولي بنركب رخام متره بسبعين ولا ثمانين هذا بالتأكيد بيتغير وبيبهت عقب شهور
الرخام الزين سعره غالي ،،،، بخبركم بعد شوي عن احسن الانواع ))

مزايااااااااااه :

الرخام شكله لا يضاهيه شكل بالجمال والفخامه ،،،مثل مانشوفه
بارضيات القصور اللي في النت ،،،ومابينه فواصل قص ليزر
شرات البورسلان تذكرون واحسن منه بعد
واينما ذهبنا نجد الرخام يدخل التصميمات ويحتل المراتب الاولى في الاستخدام

واحلى شي للسلالم اللي داخل البيت هو الرخام ،،، أما عند المدخل من برع
احسن شي واقوى شي الجرانيت الطبيعي لانه يقاوم الشمس


عيوووبه :

اهم عيب هو سعره المرتفع الحين الواحد اذا بنى البيت ياخذ اللي وراه واللي جدامه فالميزانيه ماتكفي للرخام لاغلبية الناس ،
عشان جي في ناس يكتفون بوضعه في الميالس ،،،،>>>يحليلي انا كان خاطري احطيه لكن حالي حال اغلبية الليي يعمرون ورانا مسؤوليات وضروريات اهم من الرخام ترى الشغله فيها اولويات

ومن عيوبه انه يباله صيانه دوريه للتلميع لانه ماده طبيعيه تتغير مع مرور
الزمن من التاثيرات الجويه ،، ومايتحمل التنظيف المستمر شرات السيراميك مثلا
وشي انواع وايد من الرخااام تشرب ماي وتبقع ولكن لاتنسون حتى الرخام المفروض انسويله الفحوصات القبليه مثل مااتفقنا

شوفوا جمال الرخام
وتشكيلاته الرائعه >>على فكره الرخام او البورسلان (الجرانيت) اذا دخلتي فيه تشكيلات وقطع ملونه طبعا يكون سعره اغلى
>>> ويبغيه تصميم خاص ونأخذه لمصنع تقطيع الرخام مايقطعونه العمال يفتكرونه لحمه بعدين خخخخ

هذه الصورة تم تحجيمها. اضغط على الشريط لمعاينة الصورة بالحجم الكامل. ابعاد الصورة الاصلية 580x412.


هذه الصورة تم تحجيمها. اضغط على الشريط لمعاينة الصورة بالحجم الكامل. ابعاد الصورة الاصلية 580x472.


أحسن أنواع الرخام واكثرا شيوعا من بعد تجربة الكثيرين من الناس والمهندسين

1) الكريم مارفل تبدأ اسعاره من 200 وفوووق

2)البريتشا>>>هذا شكله مميز وراقي

لونه بيج داكن و به عروق
مقاس 60 * 60 فوق ال
300 درهم متره



3) الروزا البرتغالي>>بعد روعه وعملي






) الرخام التركي ـ كريم نوفا

اللون بيج

مقاس 60 * 60 بحدود 135 إلى 155 درهم


5)الرخام العماني >>بعض الناس تقول انه يتحفر بعد كم سنه والبعض يشكر فيه

اللون بيج

مقاس 60 * 60 بحدود 130 إلى 165 ريال


(ملاحظه الالواح الطويله من كل نوع سابق اغلى بالطبع)



6) سيسيليا الايطالي >>
وهذا يركبونه وايدين على السلم الداخلي لانه قوي ويتحمل وسعره مناسب



الخلاااصه
انقول للضيف صاحب الفخامه ياهلا بك في ميالسنا وصالاتنا بس لازم انسويلك ميزاانيه خااصه
والان مع الضيف الجدييييييد

الجنتلمان ((باااااركيــــه))
وبتحدث عنه باستفااضه لاني بحثت عنه واايد
قبل لا اختااره واحجزه لغرف النوم الخمسه اللي بالدور الفوقي
اختي اتقولي (انتي جازفتي فيه)

لا اخفيكم القول اني شوي متخووفه منه ولكن اهم شي اني استخرت قبل لا احجزه

========================

فى اوروبا والدول الاسكندنافيه مثل السويد وفلندا جميع الارضيات من الخشب ذلك لانه يعتبر عازل طبيعى للصوت والحرارة ولا يمتص حرارة الجو الباردة وينقلها بدوره الى الاشخاص مثلما يفعله السيراميك او البورسيلان او حتى الرخام
فى الشرق مظم القصور صنعت ارضيات غرف النوم الخاصة بها من الباركية وفى قلعة صلاح الدين الايوبى بسوريا يوجد الباركيه ومصر كذلك يوجد فى قصر محمد على باشا

طبعا يكون باركيه طبيعي مصنوع من الخشب الطبيعى خشب السنديان الامريكى الذى يتميز بدرجة صلابة عالية حيث انه تصنع منه المراكب والسفن فى البحار وخشب الارز والجوز والماهوجنى وخشب الزان الاحمر

اذن هو من الارضيات المميزه بجمالها تختلف اسعاره باختلاف صناعته
منه الفرنسي والايطالي والصيني
وتتراوح اسعاره ما بين
45 درهم للمتر المربع الى 300 للمتر

والباركيه انواااع مختلفه ولكن هو اما

1))باركيه طبيعي من الخشب الطبيعي ويكون اغلى طبعا والوانه اكثر واشكاله احلى

2)) باركيه صناعي (لامنيت)>>وهذا اللي انا اخترته واخترت صناعته اسبانيه >> شكلي
اعجبت بشغل الاسباان هههههه المتر سعره 55 درهم من غير التركيب (التركيب على المقاول)
وهو خشب صناعي مضغوط و معالج كيميائيا مقاومته للرطوبه والاجواء اعلى من الخشب
الطبيعي (لان مثل ماسبق وتكلمت عن الرخام بما ان الرخام والخشب الطبيعي من الطبيعه
اللي الله خلقها بالتالي اكيد يتأثر بما حوله من تغييرات مناخيه)
والوانه متعدده واللون المتوسط لا غامج ولا فاتح هذا وااايد حلو ومناسب لغرف النوم الصغيره
والمتوسطه مثلا سايزها 4×4 أو 4×5،،،واذا كانت الغرفه وسيييييييعه حلو الغامق لها يعني
سايزها 5×7 وفوووق


مزاااياااااااااه //

يعطي جمااااااااااااال للمساحات وحتى لو الاثاث مب لي هناك الباركيه يحليه
يعتبر صحي جداااا لانه عازل للحراره ماينقل البرووده للعظام
وعازل للاحتكاك ان طاح الياهل عليه ما يتعور ،،،

الحلو انج ممكن تستبدلين بعض القطع المتشمخه من الاثاث مثلا او المتنفخه
بقطع ثانيه ها الشي سهل وتركيبه سريع عشان جي انا اشتريت امتار زياده لها السبب


عيووووووبه //

اذا كان طبيعي ومن اجود انواع الخشب يكون غالي ومكلف

يبغيله عنااااااايه وتنظيف خاص يعني مايتنظف بماي ومنظفات ابدااااااا يتنفخ ويخترب
بسرعه اذا جذه ،، مجرد نمسحه بفوده مبلووله بماي ومعصوووره زين
وان انجب عليه ماي او عصير على طول نمسحه

ترى هو جدا حساااس للرطوبه وجونا مايحتاي بعد
اما الدول الاوربيه جوهم ماشا الله راائع ومافيه رطوبه عسب جي يعمر عندهم الباركيه

ربيعتي محطيه باركيه طبيعي وكلفها وايد لكن ماحافظوا عليه زين يغسلونه بالديتول والماي
لي ما اتنفخت اطرافه

يصدر صوت عند المشي عليه((وبخبركم عقب كيف نتغلب على ها الشي))

وهذي صوووووور للباركيه




هذه الصورة تم تحجيمها. اضغط على الشريط لمعاينة الصورة بالحجم الكامل. ابعاد الصورة الاصلية 640x449.

شوفوا رووعة الباركيه الطبيعي ومدخلين فيه بالنص نقش(شغل محترفين)

هذه الصورة تم تحجيمها. اضغط على الشريط لمعاينة الصورة بالحجم الكامل. ابعاد الصورة الاصلية 731x800.

مزززج شكلين رووووووعه (وادخال السيراميك او البورسلان بالاطراف والكثير يدخل فراش (زل ) مع الباركيه شكله رهيب
هذه الصورة تم تحجيمها. اضغط على الشريط لمعاينة الصورة بالحجم الكامل. ابعاد الصورة الاصلية 690x571.


وهذا مقال من جريده مشهووره::

ينبغي وضع سجاد بحجم صغير عند مداخل البيوت لابعاد الاتربة والحبيبات الرملية عنها لانها قد تعمل على ازالة الزوائد من الارضيات الخشبية وبالتالي على احداث الخدوش، كما يجب تجفيف الارضية بسرعة تامة عند وقوع اي نوع من انواع السوائل عليها، إذ قد يؤدي تراكمها الى اتلاف الطبقات الداخلية وبالتالي الى تآكل الخشب ما يسبب تكوّن الحشرات بداخلها. عند تنظيف الباركيه من الضروري الابتعاد عن المنظفات المركزة التي تضر بالطبقة الخارجية التي تعمل على حماية سطح الخشب، والاكتفاء بمسحه مرة في الاسبوع بقطعة قماش مبللة بالماء والصابون ثم يُلمْع باخرى جافة وناعمة. لحماية لون الباركيه من اشعة الشمس، لا بد من تركيب ستائر ولو خفيفة لهذه الغاية. وعند التنظيف يجب رفع الاثاث من على الارض عوض جره.

أنواعه هناك نوعان من الباركيه الاول: الفوباركيه (Faux Parquet) مصنوع من الخشب الاصطناعي، متعدد الالوان والاشكال والنقوشات، ويدوم ما بين الـ 4 و5 سنوات. سعره يعكس سبب الإقبال عليه، اذ يبدأ المتر منه بـ 13 دولارا، لذا فهو مستعمل اكثر في المنازل العادية. اما الثاني وهو الـ massif مصنوع من الخشب الطبيعي ذي اللون البني واكثر ما يستعمل في القصور والمنازل الفخمة لانه من النوعية الجيدة التي قد تدوم لـ 50 سنة اذا ما تم صيانتها وتلميعها بشكل دوري كل 6 اشهر، ويتراوح سعر المتر منه بين الـ 50 و70 دولاراً.

============================== =========







باركيه صناعى Hdf :: ارضيات الباركية اللامينيت}

وهى ارضيات من الخشب الصناعى الالمانى والبلجيكى ذات الصلابة العالية والتصميمات الجذابة والمقاومة للرطوبة.
المميزات العامة
1- مقاومة عالية للرطوبة والمياه (حيث انه معالج بطبقة شديدة التحمل للرطوبة والمياه)
2- مقاومة عالية للبرى والاحتكاك (حيث انه معالج بطبقة شديدة الصلابة)
3- سهولة الفك والتركيب والصيانة (وخاصة فى نوعlock teck )
4- مقاومة عالية للإحتراق
5- امكانية عمل تصميمات متعددة لجميع الاغراض
6- سهولة التنظيف والتلميع
7- متوافر الوان عديدة تناسب جميع الاذواق




صور للباركيه الصناعي
ونحيي ضيفنا الجدييييييد الاخ ((فينييييل))( vinyl )

.نوعية أخرى من الأرضيات الجميلة يفضله البعض لسهولة تركيبه وتغييره ...ينبغي عند الشراء اختيار النوعيات الجيدة وعند التركيب يجب أن يوضع بعناية وترتيب وتملا الفراغات فيما بين القطع جيدا حتى لا تترك مفتوحة ومعرضة لدخول الأوساخ أو المياه ..

وهذا له اشكااال جمييله ،،،ومنه باشكال الباركيه

واكثر شي انشووفه في المستشفياات

أرضيات الفينيل كل يوم في تقدم جديد سواء بالشكل أو الجودة ..
النظرة العامة لبعض أنواع الفينيل تعطيكِ انطباعا أن هذه الأرضية
من الخشب أو السيراميك وذلك نظرا لتقدم صناعته وجعله شبيها جدا
للشكل الخارجي لتلك الأرضيات ولكن بتكلفة اقل بكثير ..

الفينيل أنواع .. وأسعاره تتفاوت حسب متانته,
فمن الفينيل ماهو سميك ومنه ماهو رقيق جدا وكلما كان أسمك
زادت قيمته المادية وايصبح أجود وأطول عمرا

والانواع الجيده سعر المتر فيها فوق ال100




مزاياا الفينيل

1-أنه يمكن وضعه على أي سطحٍ كان .
.سواء على البلاط العادي أو على الخشب أو على سيراميك ..
2- دائما يعطي منظر أنه جديد ..
3- سهل التنظيف ..
4- مقاوم للاحتكاك فهو امن للاطفال جدا
5- مناسب لجميع الأجواء ..
6- لاتظهر فيه الخدوش بسرعه وطبعا حسب نوعيته تكون مقاومته للخدوش ..
7- يمتلك أشكال متعددة وألوان كثيرة تشبه الأرضيات الأخرى ..
8- آمن على الأواني الزجاجية في حال سقوطها ..


عيوووبه،،،

اذا كان افينيل من النوع العادي والخفيف
فاي جرة اثاث تترك فيه اثر من غير انه اطرافه تتقطع مع مرور الوقت

ومن عيوبه ان الالوان الفلوماستر مثلا اتعلم وماتسيرمنه

واذا ماتركب زين وانتركت الفراغات تحته اكيد بتظهر منه ريحه وبيجمع تحته ماي

يعني طريقة تركيبه جداااااااااااا مهمه

وكذلك اهم عيب انه غير مقاوم للاشتعال

ويباله عنايه وتنظيف خاااص


وكلمة للضيف الجديد//
يشرفنا مروورك وشكلك غريب شوي علينا لانك مب متداول وايد في بيوتنا
لكن اكيد وجودك مهم بمراكز الاطفال والمستشفياااات

واحس انك واااااايد رووعه لغرف اطفالنا

ومع ضيفنا الأخير البطل ((جرانيت))

وهو حجر طبيعي وقالوا عنه انه يصدر اشعاعات مضره بالصحه
والله العالم هذا صدق ولا لااااا

وهو ينفع لمداخل البيوت ولاسطح المطابخ لانه مقاوم للحراره والماي

وطبعا منه انوااااع على حسب بلد الصنع


وهذا هو حجر الجرانيت على طبيعته




هذا الجرانيت يستخدم على اسطح دواليب المطابخ

هذه الصورة تم تحجيمها. اضغط على الشريط لمعاينة الصورة بالحجم الكامل. ابعاد الصورة الاصلية 600x471.

وهذا ايضا

وبالطبع نختار ألوانه بحيث يكون متناسق مع الارضيه ومع الجدران


هذه الصورة تم تحجيمها. اضغط على الشريط لمعاينة الصورة بالحجم الكامل. ابعاد الصورة الاصلية 690x459.


مزاياااااااااه :

القوة والصلاااااااااااااابه فلا يخدش ولا يكسر بسهولة ويتحمل الحرارة والبرودة ،لذلك يفضل استخدامه للمطابخ بكثرة وخاصة فوق الكبائن ليتحمل حرارة الأواني والغاز وغيرها من العوامل
كما أن الجرانيت لا يخدش بسهولة كالرخام


لهذا السبب نلقاه بكثره على مداخل البنوك وعلى جدرانها والمراكز بعد يحطونه


عيووبه:

ألوانه معدوده وتشكيلاته كذلك بعكس الرخام
والوانه معظمها غامقه ،،،،


نقول للضيف (ياهلا ومرحبااااا بك في مداخلنا وفي مطابخنا )


=========================

وفي نهااااية المطااااف مع هذه الجوووله المختصره اتمنى انكم استفدتواا منها ولا تنسوووني من دعواتكم بارك الله فيكم