مرق سمج شعوم...




الصوره ما تشوق وايد بس ترا هالمرقه لذيييييييذه... انا استخدمت سمجه شعوم وراس السبيطيه بالمرق..احط الخضرة بالمرق على 3 خطوات عشان اللون وعشان النكهه... احب المرقه تكون خاثره وهالشي حسب الذوق... اضافه دبس التمر كلش مو ضروريه وماكنت استخدمها بس لاني كنت بعادل الحموضه ضفتها.. بالعاده استخدم شوي حلبه خضرا بالحماس بس لان اختي حامل كنسلتها ... في ناس تقليالسمج قبل لا تحطه بالمرق بس انا عندي هالطريقه اخف... جربوها وصدقوني بتعجبكم...

المقادير:

شبنت مفروم

كزبرة مفرومه

خضره سمج مجففه ( شارينها من ايران بس اتوقع انها نفس اللي يبيعونها بسوق المباركيه)

بصله مفرومه

طماط مهروس بالخلاط

فلفل علوب

معجون طماط

لومي ناعم وعدل

كزبر ناعم

كاري

بهار

بزار بحريني

فلفل احمر حار حسب الرغبه

ملح وماي حار

صبار

نص الى قفشه صغيره دبس تمر

زيت

الطريقة:

نغسل السمج عدل وننقعه بملح خشن وليمون عن الزفر وبعدين نغسله بطحين وماي... نتبله بثوم وزنجبيل ونتركه

نحمس البصل لين يفتح لونه ويصير شبه شفاف وبعدين نضيف اغلب كميه الكزبره والشبنت ونحمسها على نار خفيفه لين يقلب لونها زيتي وتحسون انها جفت تقريبا وهالعمليه تاخذ وقت بس بتطلع طعم المرق وايد احلى

نضيف بعدين اللومي الناعم و الكزبره الناعمه والبهار والكاري والملح والطماط المهروس وتقلبها شوي واخرشي نضيف المعجون قبل لا نضيف الماي والفلفل العلوب والفلفل البودر

ننطره لين يغلي ونضيف الصبار واللوميه والدبس ونقط نص كميه الخضره المتبقيه وبعدين نضيف السمج ونتركه يغلي ونخفف النار عشان لا تتفتت السمجه

بعد السوا نسكر النارو نضيف باجي الخضره ويقدم بالعافيه..